Жириновскиймен қоштасуға Владимир Путин келді

Мәскеудегі Құтқарушы Христос соборында Либералдық-демократиялық партияның жетекшісі Владимир Жириновскийді ақтық сапарға шығарып салу рәсімі өтті. Шенеунікпен қоштасуға Ресей президенті Владимир Путин келді, деп хабарлайды Azattyq Rýhy тілшісі РИА Новости басылымына сілтеме жасап.

Жерлеу рәсімін Мәскеу және бүкіл Ресей патриархы Кирилл жүргізді. Саясаткермен қоштасу үлкен Дмитровкадағы Одақтар үйінің Колонна залында сағат 11.00-ден 13.00-ке дейін өтті. Жерлеу рәсімі 14:00-де Новодевичий зиратында басталды.

Қоштасу рәсімінде сөз сөйлеген Владимир Путин оның әрдайым Ресей мүддесін қорғағанын атап өтіп, Жириновскийдің жақындарына көңіл айтты. 

«Владимир Жириновский тәжірибелі саясаткер, жігерлі, ашық адам, жарқын спикер және полемист болды. Елдің ежелгі саяси партияларының бірінің негізін қалаушы және тұрақты жетекшісі. Ол Ресей парламентаризмінің, отандық заңнаманың қалыптасуы мен дамуы үшін көп жұмыс жасады, маңызды ұлттық міндеттерді шешуге шын жүректен үлес қосуға тырысты. Әрдайым кез келген аудиторияда, ең қызу пікірталастарда патриоттық көзқарасын білдіріп, Ресей мүддесін қорғады», - деді В. Путин.

Еске салсақ, Владимир Жириновский 6 сәуір, сәрсенбі күні ұзаққа созылған дерттен көз жұмды.