Түркістандық оқушы АҚШ-тың сегіз университетінің грантын жеңіп алды

Azattyq Rýhy

Қазір Жанерке алдағы емтихандар мен сынақтарға дайындалып жатыр

 
Түркістандық оқушы АҚШ-тың сегіз университетінің грантын жеңіп алды

Шалғайдағы ауыл мектебінен білім алып жүрген 11-сынып оқушысы АҚШ-тың 8 университетінің грантына қол жеткізді, деп хабарлайды Azattyq Rýhy тілшісі ҚазАқпаратқа сілтеме жасап.

Жанерке Зейлбекова Келес ауданы Біртілек ауылдық округінде орналасқан №9 Көлтоған жалпы орта мектебінде оқиды. 9-сыныптан бастап ағылшын тілін меңгеруге ден қойған. Семинарлар мен курстарға қатысып, білімін жетілдірумен келеді. Басты мақсаты – Назарбаев Университетіне түсу болатын. Ол былтыр шетелдік университеттер жариялаған онлайн олимпиадалар мен конкурстарға қатысып, бағын сынап көрді. Соның нәтижесінде АҚШ-тағы 8 университеттен оқуға шақырту алып отыр.

«Жанерке – өте зерек оқушы. Қашықтықтан оқу форматына ауысқан кезде уақытын босқа өткізбей, ағылшын тілі бойынша сабақтарға қатысып жүрді. Репетитор жалдап, онлайн дәріс алды. Мінезі салмақты, қарапайым ғана ауылдың қызы. Ешқандай гимназия, лицей емес, жәй сыныпта оқиды. Бостан, Нью-Йорк, Чикаго қалаларында орналасқан жоғары оқу орындарынан шақырту келіпті. Біз ауыл болып қатты қуанып жатырмыз», – дейді мектеп директоры Қалдыгүл Тұрсынбекова.

Қазір Жанерке алдағы емтихандар мен сынақтарға дайындалып жатыр. Құжаттарын Түркия университеттерінің біріне де өткізіп қойған. Білімді шәкірт жетістікке жетуіне себепші болған ұстаздарына дән риза. Ал өзі келешекте дәрігер болуға талпынып отыр.

×
Бұл желілік ресурстың ақпараттық өнімдері 18 жастан асқан адамдарға арналған.