Шымкент әкімдігі аэропорт аумағындағы 6 гектар жерге неге шүйлікті?
Қазір істің ақ-қарасын сот анықтап жатыр
Шымкент әуежайын сату мәселесі тағы да кейінге шегерілді, деп хабарлайды Azattyq Rýhy тілшісі.
Бәсекелестікті қорғау және дамыту агенттігінің Шымкент қаласы бойынша департаменті басшысының орынбасары Ернар Қосбаевтың айтуынша, қала әкімдігі әуежайды сату кезінде адал бәсекелестік қағидаттарын бұзған және әкімдік бекіткен шарттар бойынша белгілі бір авиакомпанияға артықшылық құқық берілгені анықталды.
«Әуежайды сатып алғысы келген «Эйр сервис» ЖШС, «Air Astana» және Шымкент қаласы әуежайының қызметкерлері сотқа арыз түсірді. Оның себебі, тендерлік комиссияның хаттамасы бойынша конкурс кезінде әуежайды сенімгерлікке алатын мекеме аэропорттың меншігінде тұрған 6 гектар жерді жаңадан терминал соққан мекемеге беру керек деген міндет қойған. Яғни, әуежайды сатып алған ұйым 6 гектар жерді жаңа терминалдың меншігіне беруге міндеттеледі. Басқаша айтқанда, сатып алған затыңыздың 1/3 бөлігін басқа біреуге беру керек боласыз. Негізі бұл жер аэропорттың құрамында болуы тиіс еді», - дейді Ернар Қосбаев.
Оның айтуынша, бастапқыда Шымкент әкімдігі Бәсекелестікті қорғау және дамыту агенттігінің шешіміне құлақ аспаған. Сотқа шағымданғаннан кейін барып сатылым тоқтатылыпты.
Әкімдік неліктен әуежайдың аумағына кіретін 6 гектар жерге шүйлігіп отыр, десек, онда жаңадан құрылғылар салу жоспарланыпты.
Айта кетерлігі, Шымкенттің әуе айлағы екі жылдан бері сатылымда тұр. Бұл нысан Қазақстан Республикасы Үкіметінің қаулысымен 2016-2020 жылдар аралығында жекешелендіруге жататындар тізіміне болған. Алайда содан бері сауда бірнеше рет сәтсіз аяқталды. Ернар Қосбаевтың айтуынша, оның себебі конкурсқа бір немесе екі ғана ұйым өтініш берген. Сол үшін әуежайды сату туралы конкурс бірнеше мәрте қайта жарияланыпты.
Биыл ақпан айының басында әуежай құны 5,7 млрд теңге деп бекітілген. Ал бір жыл бұрын баға 5,2 млрд теңге болатын
«6 гектар жер туралы шарт былтырғы конкурс талабында жарияланды. Сол кезде де біз қарсы шаққанбыз», - деді Ернар Қосбаев.
Оның айтуынша қазір істің ақ-қарасын сот анықтап жатыр.
