Жауын-шашын болады: 13 наурызға арналған ауа райы болжамы

Синоптиктер  13 наурызға арналған ауа райы болжамын жариялады, деп хабарлайды Azattyq Rýhy «Қазгидромет» РМК баспасөз хабарламасына сілтеме жасап.

«Оңтүстік циклон Қазақстанның бүкіл аумағына өз ықпалын тигізеді, тек республиканың ең шеткі солтүстігі мен солтүстік-батысы суық антициклон жотасының ықпалында қалады. Осылайша, жоғары температуралық контрасттар мен көлденең қысым градиенттерінің жоғарылауы аясында Қазақстан Республикасының аумағында фронтальды аймақ қалыптасады, осыған байланысты, жауын-шашын жауады, солтүстікте қар түрінде, жаяу бұрқасын соғады, республиканың оңтүстік жартысында көбінесе жаңбыр түрінде, оңтүстіктің, оңтүстік-шығыс және шығыстың таулы аймақтарында қатты жауын-шашын (жаңбыр, қар) жауып, көктайғақ болады. Республика бойынша жел күшейіп, тұман түседі», - делінген хабарламада.

Атап айтқанда, Ақмола, Павлодар облыстарының оңтүстік жартысында, Қостанай облысының оңтүстігінде, солтүстік-шығысында, күндіз Солтүстік Қазақстан облысының оңтүстік-шығысында жаяу бұрқасынмен, жел екпіні 15-20 м/с дейін күшейеді, Қостанай облысының оңтүстігінде тұман түседі.

Алматы облысының солтүстігінде және таулы аудандарында тұман түсіп, көктайғақ болады, күндіз облыстың шығысында желдің 15-20 м/с күшеюі байқалады.

Түркістан облысының таулы және тау бөктерлі аудандарында найзағай соғып, жел 15-25 м/с дейін күшейеді.

Жамбыл облысының солтүстігінде және таулы аудандарында тұман түсіп, көктайғақ болады, облыстың оңтүстігінде, солтүстігінде және таулы аудандарында найзағай ойнайды, жел 15-23 м/с күшейеді.

Түнде және таңертең Шығыс Қазақстан облысының солтүстігінде, батысында тұман түсіп, күндіз облыстың орталығында, оңтүстігінде, шығысында бұрқасын соғады, желдің күші 15-20, екпіні 23 м/с дейін күшейеді.

Қызылорда облысының солтүстігінде көктайғақ болып, тұман түседі, күндіз облыс орталығында жел екпіні 15-20 м/с дейін жетеді.

Қарағанды облысының солтүстігінде, орталығында көктайғақ болып, жаяу бұрқасын соғады, жел 15-20 м/с дейін күшейеді, облыстың шығысында – тұман түседі.

Батыс Қазақстан облысының батысында тұман түседі.

Атырау, Маңғыстау облыстарының солтүстігінде, батысында тұман түсіп, көктайғақ болады.

Ақтөбе облысының орталығы мен оңтүстігінде жаяу бұрқасын соғады.