Грузияның Боржоми қаласында Қазақстанның Құрметті консулының офисі ашылды – ҚР СІМ

Грузияның Боржоми қаласында Самцхе-Джавахети және Имерети консулдық округтерін қамтитын Қазақстан Республикасының Құрметті консулы кеңсесінің ашылу рәсімі өтті. Бұл туралы Azattyq Rýhy ҚР Сыртқы істер министрлігіне сілтеме жасап хабарлайды.

Іс-шараға Қазақстанның Грузиядағы Елшісі Бауыржан Мұхамеджанов, Самцхе-Джавахети аймағының губернаторы Бесарион Амиранашвили, Грузия СІМ Консулдық департаментінің директоры Георг Табатадзе, сондай-ақ Грузияның қоғамдық-саяси және іскерлік топтарының өкілдері қатысты.

«Рәсімді ашқан Елші Грузияның экономикалық, мәдени, туристік ерекшелігімен әйгілі аймақтарының бірінде Қазақстанның Құрметті консулдығының ашылуы екі елдің дәстүрлі достық пен өзара сенім рухындағы ынтымақтастығының дамуын айғақтайтынын атап өтті. Тәуелсіздік жылдары ішінде екі мемлекет қарым-қатынастардың қалыптасу кезеңін сәтті еңсеріп, уағдаластықтарды практикалық мазмұнмен және өзара іс-қимылдың жаңа бағыттарын іздестірумен толықтыра отырып, жаңа сапалы деңгейге шықты.

Қазақстанның Құрметті консулы Леван Багдавадзе өз сөзінде Құрметті консулдық  екі ел арасындағы экономикалық, мәдени, спорттық байланыстарын дамытуға толық көмек көрсететініне сендірді», - делінген ведомство хабарламасында.

Оның айтуынша, ҚР азаматтары мен заңды тұлғалары өз құқықтары мен мүдделерін қорғауда, сондай-ақ қиын жағдайларға түскен кезде көмек ала алады. Сонымен қатар, Құрметті консулдық қазіргі Қазақстанға қызығушылық танытқан Грузия азаматтары үшін ақпараттық орталыққа айналуы тиіс.