Түркістан облысында 70-ке жуық мердігер құрылыс талаптарын сақтамаған

Түркістан облысында биыл 859 нысанның құрылысы жүргізілген. Заң талаптарын сақтамай салынған 212 ғимарат қайта тексеріліп оларға қатысты хаттама толтырылды, деп хабарлады Otyrar.kz. 

Жалпы көлемі 76 млн теңге көлемінде айыппұл салынды. Оның 81,6 пайызы өндіріліп 62 млн. теңге облыстық бюджетке кіріске алынды. Бұл жайында брифингте Түркістан облысының Мемлекеттік сәулет-құрылыс бақылауы басқармасының басшысы Сапарғали Салдаров мәлімдеді.

Оның айтуынша, құрылыс талаптарын бұзғаны үшін 3 жобалаушы, 19 мердігер мекеме мен 2 тапсырыс берушіге заңға сәйкес шара көрілген. Сонымен қатар, 26 техникалық қадағалаушы және 1 авторлық тұлғалардың аттестаттарының қолданысы 6 айға тоқтатылды.