Қазір күдіктілер қамауға алынған
Алматыда тәртіпсіздік кезінде көлік ұрлағандар ұсталды. Бұл туралы қалалық ПД баспасөз қызметі мәлім етті, деп хабарлайды Azattyq Rýhy.
"Деструктив діни ағым өкілі - 1986 жылы туған азамат 6 қаңтарға қараған түні жаппай тәртіпсіздіктерді пайдаланып, үш танысмен Сүйінбай даңғылындағы сауда үйі маңында тұрған ВАЗ-2114 маркалы автокөлікті ұрлап кеткен. Алайда көлік Талғар қаласына барар жолда ұсталды", - делінген полиция хабарламасында.
Полицейлер бөтеннің көлігін заңсыз иелену фактісі бойынша қылмыстық істі Жетісу аудандық Полиция бөлімі тергеп жатқанын айтты. Қазір күдіктілер қамауға алынған.
"Сонымен қатар, Ж. есімді азамат бұрын бірнеше рет сотталған. 14 жасында 175-бабы 1-бөлігі "Ұрлық" бойынша 1 жыл мерзімге сотталып, Петропавл балалар колониясында жазасын өтеген; 2003 жылдан 2005 жылға дейін ҚК-нің 124-бабы "Зорлау" бойынша жазасын өтеген; 2006 жылдан 2014 жылға дейін ҚР ҚК-нің 120-бабы "Зорлау" бойынша Таразда жазасын өтеген", - делінген хабарламада.