Премьер-министр бірқатар өңірге ревакцинация қарқынын тездетуді тапсырды

Еліміздің үш өңірінде – ШҚО, Жамбыл, Түркістан облыстарында вакцина алуға тиісті халықтың 100%-ы бірінші компонентпен қамтылды. Бұл туралы Денсаулық сақтау министрі Ажар Ғиният Үкімет отырысында мәлім етті, деп хабарлайды Azattyq Rýhy тілшісі.

«Бүгінде 1-компонентпен 9,5 млн астам адам егілді, егілуге тиісті ересек тұрғындардың 79,6%-ы  қамтылды, екінші компонентпен  8,8 млн астам адам егілді, егілуге тиісті ересек тұрғындардың 75,8%-ды құрады», - деді министр.

Сондай-ақ, республика бойынша ревакцинациялауға жататын халықты қамту 26,8%-ды құрап отыр. 800 мыңнан астам адам қайта вакцинацияланды.

«Атырау, Түркістан облыстарында және Нұр-Сұлтан қаласында қамтылу деңгейі ең төмен, 13%-дан 17,0%-ға дейін. Барлық өңірде вакцинация мен ревакцинация қарқынын арттыру қажет – бұл бүгінгі күні ауруханаға түсудің, коронавирус инфекциясынан болатын ауыр ағым мен өлімнің алдын алудың жалғыз тәсілі болып саналады», - деді Ажар Ғиният.

Үкімет басшысы Әлихан Смайылов өз сөзінде ревакцинация қарқыны төмен өңірлерді атап, әкімдіктерге бұл бағыттағы жұмыстарды тездетуді тапсырды.

«Жыл басынан бері індетті жұқтыру деңгейі 21 есеге дейін өсіп отыр. Тәулігіне вирустың ең көп таралу жағдайы елордада, Алматы қаласында, Қарағанды және Атырау облыстарында тіркеліп отыр. Барлық өңірде эпидемиологиялық жағдайды қатаң бақылауда ұстау қажет. Қабылданған қосымша шектеу шаралары нақты орындалуы тиіс. Мониторингтік топтардың жұмысын барынша күшейту қажет. Елордада, Алматы және Шымкент қалаларында, Атырау, Түркістан, Алматы, Қызылорда және Маңғыстау облыстарында ревакцинациялану қарқыны жақсарған жоқ. Демек, бұл мәселені әкімдер дұрыс қарамай отыр. Сондықтан аталған өңірлер бұл жұмысты тездетуі керек», - деді Әлихан Смайылов.