Астанада тұрғылықты жеріне тіркелмеген 11 мыңнан астам адам жауапқа тартылды

Елордада 1 қыркүйек күні «Учаске» жедел-алдын алу шарасы басталғалы учаскелік инспекторлар 330 мыңға жуық адамға барып тексеріс жүргізді. Есепте тұрған 14 мыңнан астам азамат тұрғылықты жері бойынша тексерілді. Бұл туралы Azattyq Rýhy Нұр-Сұлтан қаласы полиция департаментінің баспасөз қызметіне сілтеме жасап хабарлайды.

Шара барысында 33 мыңға жуық адам әкімшілік жауапкершілікке тартылды. Соның ішінде Қазақстан аумағында тіркелмей тұрып жүрген 11 мыңнан астам адам, ұсақ бұзақылық жасаған 250-ге жуық адам және қоғамдық орындарда алкогольдік мас күйінде жүрген 4 мыңға жуық адам анықталған. Қоғамдық орындарды ластағаны үшін 2813 адам жауапқа тартылды.

«Азаматтардың шағымдарына жедел елеу, тұрғындармен сенімді қатынас орнату, тәртіп бұзушылықтардың алдын алу – елордалық учаскелік инспекторлардың жұмысындағы басты міндет» - деп атап өтті Нұр-Сұлтан қаласы полиция департаментінің бастығы, генерал-майор Ержан Сәденов.

Учаскелік инспекторлар 230 мыңға жуық адамды қамтитын үйге ортақ чаттарға қосылған. Сондай-ақ тұрғындармен сапалы коммуникацияны орнату үшін Телеграм мобильді қосымшасында учаскелік инспекторлардың ресми арнасын қолдану ілкі жобасы енгізілуде. Тұрғындар мен полицейлер арасындағы тығыз әрі сенімді қатынастың орнауына көбіне учаскеліктер инспекторлар, ПИК және тұрғындардың бірлескен чаттары септігін тигізуде.

«Учаске» жедел-алдын алу шарасы 1 желтоқсанға дейін жалғасады.