Түркістан облысында жыл басынан бері 734 той-жиын тоқтатылды
Өңірде тұрғындардың өміріне қатер төндіріп, той жасайтындар қатары азаймай тұр
Түркістан облысының полицейлері жыл басынан бері 734 той-жиынға тосқауыл болған, деп хабарлайды Azattyq Rýhy.
Облыстық Полиция департаментінің мәліметінше, өңірде шектеу шараларына қарамастан ережені елемей, тұрғындардың өміріне қатер төндіріп, той жасайтындар қатары көп. Осы тұста айта кететін жайт жыл басынан бері Түркістан облысының полицейлері той-жиынның 734 жайтын тіркеген.
«Мәселен, Ордабасы аудандық полиция бөлімінің тәртіп сақшылары үйінің ауласында «Беташар» тойын өткізіп жатқан тұрғынды анықтады. Оқиға орнына полицейлер тез арада жетті. Тексеру кезінде тойға 60-қа жуық адам жиналғаны белгілі болды. Нәтижесінде аталған той тоқтатылып, құқық бұзушыға ҚР ӘҚБтК-нің 425-бабы "Халықтың санитарлық-эпидемиологиялық салауаттылығы саласындағы заңнама талаптарын, сондай-ақ гигиеналық нормативтерді бұзу" бойынша құжаттар жинақталып, тиісті мекемеге жолданды», - делінген хабарламада.
Осыған ұқсас тағы бір жайт Отырар ауданында да анықталған. Онда жергілікті тұрғын карантин режиміне қарамастан үйіне 50-ден астам адамды жинап, келін түсіріп, «Беташар» тойын өткізген. Той иесіне қатысты заңға сәйкес әкімшілік шара қабылданды.
Өз кезегінде Түркістан облысының полицейлері карантин талаптары мен арақашықтықты сақтап, бетперде тағып, үнемі антисептик қолданып, адамдар көп болатын орындарға бармауға кеңес береді. Оған қоса, той өткізуге тыйым салынғанын естен шығармауға шақырады.
