ШұғылCOVID-19: Қазақстанда вирус жұқтырғандар саны 406 мыңнан асты

Нұр-Сұлтанда алдағы бес жылда 65-тен астам мектеп салу жоспарланып отыр

2030 жылға қарай елордадағы оқушылар саны 400 мыңға жуықтайды

 

Елорда тұрғындарының саны жылдан жылға артып келеді. Есепке сәйкес, 2030 жылға қарай елордада 400 мыңға жуық оқушы болады. Оларды оқу орындарымен қамтамасыз ету үшін жыл сайын қалада кем дегенде 10 жаңа мектеп ашылу қажет. Бұл туралы елорда әкімі Алтай Көлгінов «Егемен Қазақстан» газетінің тілшісіне берген сұхбатында мәлім етті, деп хабарлайды Azattyq Rýhy.

«Халық саны, соның ішінде оқушылар саны да өсіп келеді. Мәселен, 2010 жылы қалада 74 мың мектеп оқушысы болған болса, қазір 193 мың оқушы бар. Енді 10 жылдан кейін 2030 жылы, бұл көрсеткіш 400 000 оқушыға дейін өспек. Енді соған сәйкес мектептер құрылысы да қарқынды болу керек. Алдағы бес жыл ішінде 80 880 оқушыға арналған 67 мектеп салу жоспарланып отыр», - деді әкім.

Ол өз сөзінде былтыр пандемияның өршіп тұрғанына қарамастан елордада 11 мектеп жаңадан бой түзегенін, биыл тағы 16 мектептің құрылысы жүргізіліп жатқанын айтты.

Алтай Көлгінов сөз арасында ұстаздарды ынталандыру жұмысы қалай жүргізіліп жатқанын да қозғап өтті.

«Білім беру мекемелерін ғимаратпен қана қамту жеткіліксіз. Сапалы білімді арттыру мақсатында болашақ педагогтарды ынталандыру үшін, орта білім алуға жыл сайын 800, жоғары білім алуға тағы 300 әкім грантын бөлу жоспарланып отыр. Сондай-ақ, балаларды мектепке дейінгі біліммен қамту үлесі жоспарлы түрде артатын болады», - дейді Алтай Сейдірұлы.