Бүгін Қазақстан мұсылмандары Қадір түнін қарсы алады

Бүгін, яғни 8 мамырдан 9 мамырға қараған түні бүкіл әлем мұсылмандары Қадір түнін қарсы алады, деп хабарлайды Azattyq Rýhy.

Қазақстан мұсылмандары діни басқармасы еліміздегі пандемиялық жағдайды ескеріп, қауіпті дерттің таралуын алдын алу үшін қасиетті Қадір түнінде мешітте орындалатын діни рәсімдер онлайн режімде өтетінін хабарлап, арнайы мәлімдеме жасады.

«Еліміздегі және әлемдегі көптеген қоғамдық іс-шаралар мен жиындар онлайн режимде өтуде. Оның басты себебі пандемиялық жағдайды одан сайын күрделендірмеу екені белгілі. Өйткені, жұқпалы дертпен оқшаулану арқылы ғана күресудің маңызы күн сайын артуда. Әлемдік тәжірибеде коронавируспен күресудің оқшаулану тәсілі оң нәтижесін беріп жатқанын жақсы білеміз», - делінген ҚМДБ хабарламасында.

Осы ретте басқарма өкілдері Қадір кешін үйде өткізу қажеттігін қаперге салады.

«Халықтың денсаулығы мен өмірі бәрінен қымбат құндылық болғандықтан, осындай уақытша шешімді дұрыс қабылдауларыңызды және тәртіпке бағынуларыңызды сұраймыз. Әр адам өзінің отбасы мен қоғам алдындағы азаматтық әрі адамгершілік жауапкершілігін терең сезініп, жұқпалы дерттің таралмауына үлес қосса, Алланың жәрдемімен бұл сынақты да еңсереміз. Алла Тағала «Бақара» сүресінің 195-аятында: «Өздеріңді өз қолдарыңмен қауіп-қатерге салмаңдар», – деп бұйырған. Бұл аят баршамызға өмірлік ғибрат болуы тиіс», - деді ҚМДБ өкілдері.

Сондай-ақ Қазақстан мұсылмандары діни басқармасы қасиетті Қадір түнінде отандық телеарналар мен «Халық арна», «Хикмет ТВ» және muftyat.kz сайтының әлеуметтік желідегі парақшаларында арнайы онлайн бағдарлама ұйымдастырады.

Қазақстандықтар «Қасиеті мол қадір түні» атты онлайн бағдарламада елімізге белгілі ғалымдардың уағыз-насихатын тыңдап, Құран хатым дұғасына қатыса алады. Тұрғындар діни басқарма жанындағы ақпарат беру орталығына (call center, 8 7172 33 30 30) тәулік бойы хабарласып, көкейдегі сауалын қоя алады.

«Алла Тағала сауабы мың айдан артық, түндердің төресі, қасиетті Қадір кешінде үйде жасаған дұға-тілектерімізді, құлшылық-ғибадаттарымызды қабыл етіп, мешіттерімізде бір сапта тұрып, намаз оқитын күнді жақын еткей. Жаратушы Жаббар Иемізден жер бетінен жұқпалы індетті жойып, қалыпты күнге оралып, қуанышты күндерге жеткізуін тілейміз. Еліміз аман, жұртымыз тыныш болғай. Әмин!», - делінген ҚМДБ хабарламасында.