Эпидемиологтар елорда тұрғындарына үндеу жасады

Мамыр айындағы мерекелер жақындап келеді. Қала тұрғындары бұл күндері топ болып таза ауада сауық құрғанды ұнатады. Осыған байланысты елорданың санитарлық-эпидемиологиялық бақылау департаменті қала тұрғындарына қауіпті вирустың денсаулыққа қауіп төндіретінін кезекті рет ескертті, деп хабарлайды Azattyq Rýhy Нұр-Сұлтан әкімдігінің баспасөз қызметінің сайтына сілтеме жасап.

Нұр-Сұлтан эпидемиологиялық ахуалды бағалау бойынша «қызыл» аймақта тұрғанына бір жарым ай болды. Күн сайын қалада КВИ ауруының 600-ге жуық жаңа жағдайы тіркеледі.

Осыған байланысты Нұр-Сұлтан қаласының санитариялық-эпидемиологиялық бақылау департаменті елорданың барлық азаматтарын мереке күндері түсіністікпен қарап, карантин режимін қатаң сақтауды сұрайды. Қауіпті вирус бәрінің денсаулығына қауіп төндіреді. Қонаққа, көршілерге, ірі отырыстарға бармауға, артық және маңызды емес сапарларға шықпауға ұсынамыз.

«Негізгі қауіп тобында әлі де созылмалы аурулары бар адамдар мен аға буын өкілдері тұр. Сондай-ақ, балалар да жұқтыруы мүмкін. Пандемия кезінде әлеуметтік қашықтықты сақтау өте маңызды екенін ұмытпаңыз. Біз өзімізді оқшаулағанда және вакцинация қабылдаған кезде ғана індетті жеңеміз. Сондықтан біз барлық ұсыныстарды орындауға және пандемиямен күресте жауапкершілік пен бірлікті көрсетуге шақырамыз», - делінген хабарламада.