ШұғылЕлімізде тағы 7778 адамнан коронавирус анықталды

Жыл басынан бері өндірістегі жазатайым оқиғалар салдарынан 310 адам зардап шеккен

Осы жылдың I тоқсанында өндірістік жарақаттану деңгейі 9%-ға төмендеді

Фото: ашық дереккөзден

2021 жылдың қаңтар-наурыз айларында өндірістегі жазатайым оқиғалар салдарынан 310 адам зардап шекті, ал өткен жылдың сәйкес кезеңінде зардап шеккендер саны 341 адамды құрады, деп хабарлайды Azattyq Rýhy ҚР Еңбек және халықты әлеуметтік қорғау министрлігінің баспасөз қызметіне сілтеме жасап. 

Осы жылдың 1-тоқсанында Қазақстанда өндірістік жарақаттану деңгейі 9,1%-ға төмендеді. Бұл ретте оқыс оқиғалар салдарынан қаза тапқандардың саны төрттен бірге қысқарды: ағымдағы жылы – 38 адам, ал 2020 жылдың I тоқсанында – 51 адам.

Өндірістік жарақаттанудың жоғары деңгейі Қарағанды (65 адам зардап шекті), Шығыс Қазақстан (34 адам), Ақтөбе (29 адам), Қызылорда (22 адам), Қостанай (21 адам), Түркістан (18 адам) және Батыс Қазақстан (17 адам) облыстарында сақталуда.

Бірқатар өңірде I тоқсанда өндірістегі жазатайым оқиғалар салдарынан зардап шеккендер саны Ақтөбе облысында 25-тен 29 адамға дейін, Атырау облысында 6-дан 10 адамға дейін, Қызылорда облысында 14-тен 22 адамға дейін және Павлодар облысында 13-тен 15 адамға дейін өсті.

Жазатайым оқиғалар салдарынан қаза болғандар саны 2020 жылдың ұқсас кезеңімен салыстырғанда Ақтөбе (4-тен 7 адамға дейін), Жамбыл (2-ден 4 адамға дейін), Қызылорда (3-тен 6 адамға дейін), Батыс Қазақстан (2-ден 3 адамға дейін) облыстарында көбейді.