Іле-Алатау ұлттық паркінен жер телімдерін беруге қатысты тендер өтпейтін болды

Іле-Алатау ұлттық паркінен жер учаскелерін қысқа және ұзақмерзімді пайдалануға беруге арналған конкурс пен тендер өтпейтін болды. Бұл туралы ҚР Экология және геология және табиғи ресурстар министрлігі Орман шаруашылығы және жануарлар дүниесі комитеті мәлімдеді, деп хабарлайды Azattyq Rýhy.

Орман шаруашылығы және жануарлар әлемі комитеті Іле-Алатау мемлекеттік ұлттық табиғи паркінен жер учаскелерін туристік және рекреациялық қызметті жүзеге асыруға 25 жылға дейін ұзақмерзімді және 5 жылға дейін қысқамерзімді пайдалануға беруге бағытталған конкурс пен тендердің өтпейтінін хабарлайды.

«Бұған жоспарланған тендер мен конкурстың өтетін уақытына қатысты жіберілген техникалық қателіктер себеп болып отыр», - делінген ведомство хабарламасында.

Еске салсақ, 2021 жылы ақпан айында Іле-Алатау ұлттық паркінде экологиялық туризм инфрақұрылымын дамытудың Бас жоспарын қарау бойынша қоғамдық тыңдау өткен болатын. Қоғамдық тыңдау хаттамасы Іле-Алатау ұлттық паркі мен Алматы қаласы және Алматы облысы туризм басқармаларының сайттарында жарияланды. Ұлттық парктерде туристік және рекреациялық қызметті жүзеге асыру ережесіне сәйкес тендерлік және конкурстық құжаттар жобасы да ұлттық парктің интернет-ресурсына салынды.

«Жақын арада «Іле-Алатау» МҰТП тендер мен конкурс бойынша талқылау және түсіндіру жұмысын жүргізеді. Қабылданатын шешімдердің ашықтығын қамтамасыз ету үшін ұлттық парктің Қоғамдық кеңестерінің отырысы да өткізіледі.

Атап өтсек, ерекше қорғалатын табиғи аумақтарда экологиялық туризмді дамыту азаматтардың бойында табиғатқа жанашырлықты қалыптастыруға септігін тигізетін экологиялық ағарту жұмысын жүргізуге және жергілікті халықты қызмет көрсету саласында жұмыспен қамтуға мүмкіндік береді», - делінген хабарламада.

Тендер мен конкурсқа қатысты ақпарат Іле-Алатау ұлттық паркінің www.ile-alatau.kz сайтында жарияланады.