ШұғылӨткен тәулікте елімізде 753 адамнан коронавирус анықталды

2021 жылы Қазақстанда халық санағы жаңа тәсілмен жүргізіледі

Ұлттық халық санағы қазан айына жоспарланған

Фото: ашық дереккөзден

Қазақстанның стратегиялық жоспарлау және реформалар агенттігінің төрағасы Қайрат Келімбетов 2021 жылы ұлттық халық санағын өткізу туралы айтты, деп хабарлайды Azattyq Rýhy тілшісі.

«Президент жанындағы реформалар жөніндегі Жоғары Кеңестің шешіміне сәйкес, ұлттық санақ биыл жүргізіледі. 2021 жылғы ұлттық халық санағының жаңалығы – заманауи цифрлық технологияларды енгізу және процесті автоматтандыру», - деді Келімбетов Үкімет отырысында.

Енді тұрғындар туралы деректерді жинау 2 жолмен жүргізіледі.

«Бірінші әдіс – sanaq.gov.kz сайтында интернет сауалнама жүргізу. Ол виртуал көмекші арқылы, қай жерде отырғанына қарамастан, өзі және отбасы жайлы санақ парағын толтыруға мүмкіндік береді.

Екіншісі – қажетті санитарлық нормаларды сақтай отырып, дәстүрлі аралау. Бұл онлайн режимде санақтан өтпеген респонденттер арасында жүргізіледі.

Тағы бір жаңалық – үй-үйді аралағаннан кейін мәліметтер планшетке жүктеледі және жергілікті мектептерге беріледі. Мұндай санақ 1-30 қазан аралығында жүргізіледі», - деді ол.

Естеріңізге сала кетейік, 29 қаңтарда Мемлекет басшысы Реформалар жөніндегі Жоғары Кеңестің отырысында биыл қазан айында халық санағын жүргізуді, ал 2022 жылдың ортасына қарай түпкілікті деректерді жариялауды тапсырған болатын.

Сымбат Ғалымжан, Нұр-Сұлтан