ШұғылЕлімізде өткен тәулікте 855 адамнан коронавирус анықталды

Иордания Корольдігі Қазақстанның «AntikorNews» жобасына қызығушылық танытты

Бұл жоба сыбайлас жемқорлыққа қарсы контенттің үздіксіз онлайн көрсетілімін қамтамасыз етеді

Иордания Корольдігінің Сыбайлас жемқорлыққа қарсы комиссиясы «AntikorNews» медиа-жобасына қызығушылық танытты, деп хабарлайды Azattyq Rýhy.

Бүгін өткен «AntikorNews» онлайн брифингі барысында ҚР Сыбайлас жемқорлыққа қарсы іс-қимыл агенттігінің серіктестік департаменті директорының орынбасары Перизат Сәдуақас агенттіктің 2020 жылы сәуір айынан бастап эксклюзивті контенті бар «AntikorNews» атты ерекше медиа-жобасын іске қосқанын мәлімдеді.

«AntikorNews» агенттіктің БАҚ-пен және жұртшылықпен өзара іс-қимылының маңызды құралы ретінде сыбайлас жемқорлыққа қарсы контенттің үздіксіз онлайн көрсетілімін қамтамасыз етіп, сондай-ақ Антикор қызметінің нәтижелері мен басымдықтары туралы жедел хабарлайды.

Перизат Сәдуақастың айтуынша, мемлекеттік және орыс тілдеріндегі «AntikorNews» жаңалықтары алдын алу шараларына, сыбайлас жемқорлыққа қарсы заңнамаға, агенттіктің қоғамдық алаңдағы жұмысына қатысты мәселелердің кең ауқымын қамтиды (мысалы, «Адалдық алаңы», Арнайы мониторинг тобы, Республикалық ақпараттық-ағарту штабы, «Сапалы жол», «Ашық бюджеттердің интерактивті картасы», «Адал көмек», «Саналы ұрпақ» және т.б.).

Ол апта сайын агенттіктің ресми сайтында және әлеуметтік желілердегі аккаунттарында жарияланып, барлық өңірлік телеарналардан көрсетіледі.

2020 жылы орталық аппарат Сыбайлас жемқорлыққа қарсы қызмет туралы «AntikorNews»-тің 40 шығарылымын, аумақтық департаменттер 650 шығарылымын әзірледі.

Спикер бұл жобаның азғана уақыт аралығында нәтиже беріп, сұранысқа ие болғанын, оның тұжырымдамасына тіпті Иордания Корольдігінің Сыбайлас жемқорлыққа қарсы комиссиясының қызығушылық танытып, өз ведомстволарында осындай жобаны енгізуді жоспарлап жатқандығын ерекше атап өтті.

«Сондай-ақ «AntikorNews» жобасының аясында 60-қа жуық брифинг өткізіліп, 130-ға жуық жедел түсірілім және БАҚ-та 6,2 мыңнан астам материал жарияланды. Сыбайлас жемқорлыққа қарсы өзекті тақырыптар бойынша аумақтық департаменттер де апта сайын өздерінің баспасөз брифингтерін ұйымдастырды. Былтыр 800-ден аса спикердің, сондай-ақ облыс әкімдерінің (98 шара) қатысуымен 587 брифинг өткізілді», - деді Перизат Сәдуақас.