«Беделіме нұқсан келтіріп отыр»: желіде Өтемұратовтың қызметкерлеріне жазған хаты жарияланды

Әлеуметтік желілерде «Ұлыбритания соты активтерін бұғаттады» деп хабарланған «Верный капитал» компаниялар тобының негізгі акционері Болат Өтемұратовтың компания қызметкерлеріне арнап жазған хаты жарияланды. Хатта автор «беделіме және компания атына нұқсан келтіріп, бизнесіме зиян тигізу үшін жасалып отыр» деп жазған.

«Өткен аптаның аяғында ағылшын сотынан электронды почтамызға «Верный Капитал» компаниялар тобының қаржысына бұғаттау қойылғаны туралы құжаттар тізімі келді. Бұл БТА банк ісіне қатысты делінген.

Шок болғанымды мойындаймын. Дереу мәселенің мән-жайын анықтауға кірістік. Заңгерлер сот шешімінің жалған құжаттарға сүйеніп шығарылғанын растады. Қазір сот шешімінің күшін жою үшін талпынып жатырмыз, бірақ оған біраз уақыт керек және мәселе жақын арада шешіледі деп сенемін. Сот процестері жүріп жатқан шақта ресми мәлімдеме жасамаймын. Барлық компаниялар қалыпты режимде жұмыс істей береді» - делінген 6 желтоқсанда жазылған хатта.

Хат авторы компания қызметкерлерін сабыр сақтап, жұмыс істей беруге шақырған.

«Бұл жағдайлардың бәрі сіздерге, отбасыларыңызға қалай әсер етіп жатыр екен деп уайымдаймын. Қаншама сұрақ туындағанын да ойлап отырмын. Түсініксіз жағдайлардың тұтунышылар мен достардың, жақындардың қарым-қатынасына әсер ететінін түсінемін.

Қазір бір ғана нәрсе айта аламын. Бұл менің және компанияларымның беделіне нұқсан, бизнесіме зиян келтіру үшін жасалып отыр. Біз ақ екенімізді дәлелдейміз», - делінген.

30 қарашада Өтемұратов активтерінің бұғатталғаны жайлы ақпарат тарады. «Верный капитал» бұл ақпаратты жоққа шығарды.