Атырауға шет елдерден ПТР-анықтамасы жоқ 37 қазақстандық ұшып келген

Атырау облыстық Тауарлар мен көрсетілетін қызметтердің сапасы мен қауіпсіздігін бақылау департаментінің мәліметінше, Атырау қаласына 20-25 қазан аралығында шетелден Ыстамбұл – Атырау, Ташкент – Атырау, Амстердам – Атырау бағытында 4 әуе рейсі ұшып келді. Халықаралық әуе рейсімен барлығы 456 адам жеткізілген.

Әуе рейсімен келген жолаушылардың арасында шетелдіктер жоқ, бәрі Қазақстан азаматтары. Олардың 37-інде ПТР-тест қорытындысы болмағандықтан, карантиндік стационарларға жатқызылған.

Жолаушылардан коронавирус жұқпасына сынама алынды, қорытындысы теріс мәнді көрсетті. Ешқайсысынан қауіпті инфекция анықталмағандықтан үйлеріне жіберілді.

Еске сала кетейік, 26 қазаннан бастап Қазақстанға халықаралық рейстермен келетін жолаушылардың бәрінде, оның ішінде Қазақстан азаматтарында ПТР-тесттен өткені туралы анықтамасы болуы міндетті.