Сабақтың тоқтатылуы мен жолдардың жабылғанын хабарлайтын мобильдік қосымша жасалды

Қазақстанда жолдардың жабылуы, сабақтың тоқтатылуы және сейсмикалық қатерлер туралы хабарландыратын мобильдік қосымша жасалды, деп хабарлайды Azattyq Rýhy тілшісі ІІМ ТЖ комитетінің баспасөз қызметіне сілтеме жасап.

«ҚР ІІМ Төтенше жағдайлар комитеті «I2NIK» компаниясымен бірлесіп «Darmen» мобильдік қосымшасын іске қосты. Ол дауылды гидрометеорологиялық құбылыстар, сейсмикалық қатерлер, қысқы кезеңде автомобиль жолдарының жабылуы, республиканың барлық аумағындағы профилактикалық және басқа да іс-шаралар туралы халықты уақытылы хабардар етуге мүмкіндік береді. Сонымен қатар қыс басталғаннан кейін аталған қосымша мектеп оқушылары мен олардың ата-аналарын ауа райының қолайсыздығына байланысты мектептерде сабақтардың тоқтатылғаны туралы хабар таратады», - делінген хабарламада.

«Darmen» мобильдік қосымшасы «Play market /darmen/» және «App store /darmen/» жүктеуге болады. Қосымшаны жүктегеннен кейін тиісті өңірді таңдау қажет. Жедел хабарлама push-хабарламалар арқылы жеткізіледі.