Нұр-Сұлтанда тұрғын үйге құжаттар қабылдау 7 қазанға дейін жалғасады

28 қыркүйек күні елордада бастапқы жарнасыз, сатып алу құқығымен жалға берілетін баспанаға өтінім беру басталды, деп хабарлады әкімдіктің ресми сайты. Құжаттарды қабылдау 7 қазанға дейін жалғасады. Азаматтарға 244 пәтер беру жоспарланған.

БАҒДАРЛАМАҒА КІМДЕР ҚАТЫСА АЛАДЫ? 

Нұр-Сұлтан қаласы әкімдігі, «Тұрғын үй қоры» КММ, түгендеу және есепке алу бөлімінің маманы Ақнұр Мақсатқызы Azattyq Rýhy тілшісіне берген сұхбатында бағдарламаның шарттары туралы толықтырып ақпарат берді. 

«Бағдарламаға тұрғын үй кезегінде тұрған және білім беру, денсаулық сақтау, мәдениет, спорт салаларының және Нұр-Сұлтан қаласының әкімдігіне бағынышты әлеуметтік қорғау мекемелерінің қызметкерлері болып саналатын барлық санаттағы азаматтар, сондай-ақ полиция және төтенше жағдайлар департаменттерінің қызметкерлері қатыса алады. Жұмыс өтілі маңызды емес»,- деді маман.

ӨТІНІМ БЕРУ ҮШІН НЕ ІСТЕУ КЕРЕК?

Бағдарламаға өтінімдер zhilfond.kz сайты арқылы онлайн қабылданады. Өтінім беру үшін ЭЦҚ кілті және жұмыс орнынан анықтама болуы керек.

«Қазіргі таңда тұрғын үй кезегінде 46 908 азамат тұр. Сұраныс өте көп. Екі күннің ішінде екі мыңға жуық өтінім келіп түсті», - деді Ақнұр Мақсатқызы.

ПӘТЕР ҚАНДАЙ ТҰРҒЫН ҮЙ КЕШЕНІНЕН БЕРІЛЕДІ?

224 пәтерді Н.Тілендиев даңғылында орналасқан «Жаңа қоныс» тұрғын үй кешенінен және С.Торайғыров көшесінде орналасқан «Замечательный» ТК-дан жалға беру жоспарлануда. 

БАҒДАРЛАМАНЫҢ ШАРТТАРЫ

•  Жалға алудың ең ұзақ мерзімі – 20 жыл (Ол аяқталғаннан кейін тұрғын үй жалға алушының меншігіне өтеді);
•  бастапқы жарнасыз;
•  табыс жеткіліксіз болған жағдайда кепілгерлерді тарту мүмкіндігі;
•  жалға берілетін тұрғын үйді мерзімінен бұрын сатып алу мүмкіндігі.

ЖАЛҒА АЛУШЫЛАР ҮШІН ЖАЛДАУ ТӨЛЕМІ (1 ШАРШЫ МЕТР ҮШІН):

• Нұр-Сұлтан, Алматы қалаларында және олардың қала маңы аймақтарында, Шымкент, Атырау, Ақтау қалаларында – 1 455 теңге;
• басқа өңірлерде − 1 232 теңге.

БҰЛ ЖОБАҒА ҚАНША ҚАРАЖАТ БӨЛІНДІ?

Бұл тақырып төңірегінде бағдарлама операторы «Қазақстан ипотекалық компаниясы» ИҰ» АҚ Басқарма төрағасының орынбасары Мәжит Ғалымжанұлы Жүсіпов Azattyq Rýhy сайтына жауап берді.

2019-2021 жылдарға арналған қаржыландырудың жалпы көлемі (меншікті және қарыз қаражаты) 40 млр теңгені құрайды.

«Оның ішінде 2019 жылға – 1,8 млрд теңге, 2020-21 жылға – 38,2 млрд теңге бөлінген. Осы қаражат есебінен 2019-2021 жылдары 2 мың 300 мұғалім мен дәрігерді жалға берілетін тұрғын үймен қамтамасыз ету жоспарлануда. Бүгінгі күні Алматы, Қарағанды, Нұр-Сұлтан, Ақтау, Қостанай қалаларында ауданы 92,6 мың м2 (1 514 пәтер),  жалпы сомасы шамамен, 23 млрд теңгеге пәтер сатып алуға шарттар жасалды»,- деді Мәжит Жүсіпов.

БАҒДАРЛАМА ҚАЗАҚСТАННЫҢ ТАҒЫ ҚАНДАЙ ҚАЛАЛАРЫН ҚАМТИДЫ?

Қазіргі уақытта бұл бағыт сәтті жүзеге асырылуда және жаңа жалға алушылар үш қалада қоныс тойын тойлап үлгерді.

«2019 жылы Ақтөбе қаласы бойынша жалға алушылармен жұмыс жүргізілді: қыркүйек айының соңындағы жағдай бойынша, 56 жалдау шартына қол қойылды. Қарағандыда 21 пәтер, Қостанайда 54 пәтер жалға берілді, Ақтауда 56 пәтерге қол қою және қоныстандыру бойынша жұмыстар жүргізілуде. Алматы (288 пәтер) және Нұр-Сұлтан (146) бойынша төлем қабілеттілігін тексеру рәсімі жүргізілуде»,- деді компания өкілі Мәжит Жүсіпов.

БАҒДАРЛАМА АЯСЫНДА 19 МЫҢ ПӘТЕР БЕРІЛДІ

2015 жылдан бастап 2019 жылға дейін Қазақстан ипотекалық компаниясы (ҚИК) «Нұрлы жер» мемлекеттік бағдарламасының операторы бола отырып, халықтың әлеуметтік осал топтарына 20 жылға дейінгі мерзімге сатып алу құқығымен жалға берілетін тұрғын үй берді. Осы бағдарлама аясында ҚИК желісі бойынша ҚР Ұлттық қорынан 115 млрд теңге және республикалық бюджеттен 48,3 млрд теңге бөлінгенін айта кету керек.  

«Қазіргі уақытта барлық қаражат толық көлемде іске асырылды: бұл ҚИК-ке елдің 16 өңірінде шамамен, 110 объектіні салуға және бөлуге мүмкіндік берді, бұл 19 мың пәтерді немесе 1 млн шаршы метрден астам тұрғын үйді құрайды»,- деді Қазақстан ипотекалық компаниясы» ИҰ» АҚ Басқарма төрағасының орынбасары. 

2019 жылы бірқатар өзгерістер енгізілгенін айта кету керек. Дәл осы жылы ҚИК осы бағытты жалғастырып, дәрігерлер мен мұғалімдер үшін жалға берілетін тұрғын үйге 40 млрд теңгеге жуық меншікті және қарызға алынған қаражатты инвестициялады, маусым айында Ғылым және білім министрлігімен, сондай-ақ ҚР Денсаулық сақтау министрлігімен тиісті келісімдерге қол қойды.

Ал осы жылдың тамыз айында «Қазақстанның ипотекалық компаниясы» Нұр-Сұлтан қаласының әкімдігімен осы бағдарлама аясында әлеуметтік пәтер алушылардың санатын кеңейту туралы келісімге қол қойды. Енді жалға берілетін тұрғын үйге әкімдікке ведомстволық бағынышты білім беру, мәдениет, спорт, әлеуметтік қамсыздандыру саласының қызметкерлері, сондай-ақ Нұр-Сұлтан қаласы Полиция департаментінің қызметкерлері қатарынан үміткер бола алады.

БАҒДАРЛАМА ЕЛІМІЗДЕГІ ТҰРҒЫН ҮЙ МӘСЕЛЕСІН ШЕШЕ АЛА МА?

Экономист, маркетолог Айдос Маруанның пікірінше, елімізде тұрғын үй мәселесі өзектілігін жоғалтқан жоқ. Бұл ретте экономист бірнеше мәселені айтып өтті.

«Қаншама уақыттан бері іске асып келе жатқан мемлекеттік бағдарламалар тиімділігін көрсетіп отырған жоқ. Олардың бірі ашылады, бірі жабылады. Мәселен, 7-20-25-ті алып қарайтын болсақ, басталғалы бері, 2018 жылдан бастап халықтан 35 мыңға жуық өтінім келіп түсті. Оның 20 мыңы ғана мақұлданып, 17 мыңына ғана пәтер берілді. Бұл өте төмен көрсеткіш. Осы жылдың өзінде шамамен, 10 мыңға жуық адам өтініш берсе, оның шамамен, 5 мыңына ғана қарыз беріледі. Екінші мәселе, бюджеттен қанша ақша бөлінсе де, адамдар тарапынан өтінім аз түседі. Неге? Өйткені, нарықтың өзінде пәтер бағасының көрсеткіші өте жоғары. Үшіншіден, JPI-дың дұрыс орындалмауы. Мемлекет қаражат бөледі, оны іске асыру жағы ақсап тұр. Дұрыс ұйымдастырылмағандықтан бағдарлама тиімділігі аз. Мердігерлер, құрылыс компаниялары өздерінің үстіне қойылған JPI-ды дұрыс өткізбейді. Мәселен, мың пәтер өткізуі керек болса, олар екі жүзін ғана өткізеді. Яғни, олардың жұмысын қадағалайтын ведомство жоқ. Кім жасайды, кім жауап берді, бөлінген ақша қайда кетті, оны кім ұйымдастырып жатыр, сметасын еш жерден таба алмайсың»,- деді Айдос Маруан.

Ал сатып алу құқығымен жалға берілетін тұрғын үй бағдарламасына маркетолог оң пікір білдірді. 

«Сатып алу құқығымен берілетін үй Қазақстанның көп аймағында қолжетімсіз. Нұр-Сұлтан қаласында осы бағдарламамен пәтер беруге өтінім қабылдау қазір жүріп жатыр. Бұл бағдарламаға қатысып, пәтер иеленудің ең ұзақ мерзімі – жиырма жыл. Ұтымды. Шаршы метрі үшін өте аз қаражат бөлу қарастырылған. Бір артықшылығы, отбасы құрамына, статусыңызға ешкім қарамайды»,- деді Айдос Маруан.

ЖАЛҒА БЕРІЛЕТІН ТҰРҒЫН ҮЙ АЛУШЫЛАРДЫ ІРІКТЕУ КЕЗЕККЕ ҚОЙЫЛҒАН КҮНГЕ СӘЙКЕС ЖҮРГІЗІЛЕДІ

Бұдан ары әлеуетті жалға алушылар төлем қабілеттілігін және басқа да мәселелерді растау үшін осы тұрғын үй бағдарламасының операторына, «Қазақстан ипотекалық компаниясы» АҚ-на жүгінулері қажет. Ол үшін ҚИК жедел желі телефонына хабарласу қажет: 8 800 080-44-48.

Айта кетерлігі, елорда азаматтарына сатып алу құқығымен жалға пәтер беру жыл соңына дейін осы 224 пәтермен шектеледі. «Алдағы уақытта сатып алу құқығымен жалға берілетін пәтерлер саны арта ма?» деген Azattyq Rýhy сауалына:

«Ағымдағы жылы осы бағдарлама шеңберінде өзгерістер қарастырылмаған. Өзгерістер болған жағдайда, біз, әрине, бұл ақпаратты корпоративтік сайттың беттерінде, сондай-ақ әлеуметтік желілердің беттерінде хабарлаймыз», - деді Қазақстан ипотекалық компаниясы.

Сымбат Молдатай, Нұр-Сұлтан