Соңғы бір аптада Кавасаки синдромымен бірде-бір дерек тіркелмеген
Қазақстанда Кавасаки синдромына ұқсас ауруға 35 бала шалдыққан. Бұл туралы Денсаулық сақтау министрлігінің ресми өкілі Бағдат Қожахметов мәлім етті.
«Соңғы деректер бойынша, 40 бала КВИ-ге шалдығып, ем алды. Олардың ішінде Кавасаки синдромына ұқсас белгілермен ауырған балалар саны 35-ті құрайды, 31 бала емделіп үйіне қайтты. Қалған төрт бала әлі де ем алуды жалғастырып жатыр. Бір қуантарлығы, соңғы бір аптада КВИ жұқтырған бірде-бір бала Кавасаки синдромымен тіркелген жоқ. Емделіп шыққан балалар учаскелік дәрігерлердің қарауында», - деді Бағдат Қожахметов.
Айта кететіні, пандемия басталғалы бері Қазақстанда шамамен, 2,5 мың бала коронавирус инфекциясымен ауырды, оның ішінде 111 жаңа туған нәресте бар. Балалардың 80%-да ауру симптомсыз өтті. Тек 20%-ы ғана орта деңгейде ауырып шықты.
Айжан Қалиева, Нұр-Сұлтан