Боран, көктайғақ және жаңбыр: 9 қарашада бірнеше өңірде дауылды ескерту жарияланды

9 қарашада Қазақстанның бүкіл аумағында дауылды ескерту жарияланды. Синоптиктер жауын-шашын, оның ішінде қатты жауын-шашын, найзағай, тұман және екпінді жел болатынын болжайды. Сонымен қатар бірқатар өңірде өрт қаупі жоғары және төтенше деңгейде сақталады, деп хабарлайды Azattyq Rýhy «Қазгидрометке» сілтеме жасап.

Астанада жаңбыр мен қар жауады, түнде кей уақытта қатты жауын-шашын күтіледі. Жел оңтүстік-шығыстан соғып, солтүстік-батысқа ауысады. Түнде желдің екпіні секундына 15-20 метрге жетеді.

Ақмола облысында түнде жаңбыр мен қар жауады. Өңірдің солтүстігінде, шығысында және оңтүстігінде жауын-шашын қатты болады. Батысы мен солтүстігінде жер бетіндегі бұрқасын мен көктайғақ күтіледі. Күндіз солтүстігінде, шығысында және оңтүстігінде жаңбыр мен қар жауады. Түнде және таңертең батысында, оңтүстігінде және шығысында тұман түседі. Жел оңтүстік-шығыстан соғып, батысында, оңтүстігінде және шығысында солтүстік-батысқа ауысады. Желдің екпіні 15-20 м/с болады. Көкшетауда түнде жаңбыр мен қар жауып, кей уақытта қатты болады. Көктайғақ күтіледі.

Солтүстік Қазақстан облысында түнде шығысы мен оңтүстігінде жаңбыр мен қар жауып, жер бетіндегі бұрқасын болады. Батысы мен солтүстігінде аздаған жауын-шашын күтіледі. Күндіз солтүстігінде, шығысында және оңтүстігінде аздаған жауын-шашын болады. Көктайғақ күтіледі. Батысында, солтүстігінде және оңтүстігінде тұман түседі. Петропавлда аздаған жаңбыр мен қар жауып, көктайғақ және тұман болады.

Қостанай облысында түнде және таңертең оңтүстігі мен шығысында жаңбыр мен қар жауады, солтүстігінде аздаған қар түседі. Көктайғақ күтіледі. Батысында, солтүстігінде және шығысында тұман түседі. Оңтүстік-батысында өрт қаупі жоғары деңгейде сақталады. Қостанайда түнде және таңертең тұман болады.

Павлодар облысында түнде және таңертең солтүстігі мен орталығында тұман түседі. Павлодар қаласында да түнде және таңертең тұман күтіледі.

Қарағанды облысында жаңбыр жауады, батысы мен солтүстігінде кей уақытта қатты болады. Түнде және таңертең батысында, солтүстігінде және шығысында тұман түседі. Жел оңтүстіктен соғып, солтүстігі мен шығысында солтүстік-батысқа ауысады. Желдің екпіні 15-20 м/с болады. Қарағандыда жаңбыр жауады. Түнде және таңертең тұман түсіп, оңтүстік жел солтүстік-батысқа ауысады. Желдің екпіні 15-20 м/с болады.

Ұлытау облысында жаңбыр жауады, солтүстігі мен шығысында кей уақытта қатты болады. Түнде және таңертең батысында, солтүстігінде және орталығында тұман түседі. Жел оңтүстік-шығыстан соғып, түнде және таңертең батысында, солтүстігінде және шығысында солтүстікке ауысады. Желдің екпіні 15-20 м/с болады. Жезқазғанда жаңбыр жауып, түнде және таңертең тұман түседі.

Шығыс Қазақстан облысында солтүстігінде, оңтүстік-шығысында және орталығында оңтүстік-шығыс желі соғады. Желдің жылдамдығы 15-20 м/с, екпіні 25 м/с-қа дейін жетеді. Өскеменде оңтүстік-шығыс желі соғып, күндіз екпіні 15-20 м/с болады.

Абай облысында солтүстігінде, батысында және орталығында оңтүстік-шығыс және оңтүстік жел соғады. Желдің жылдамдығы 15-20 м/с, екпіні 23-28 м/с-қа дейін жетеді. Оңтүстігінде өрт қаупі жоғары деңгейде сақталады. Семейде оңтүстік-шығыс және оңтүстік жел соғып, екпіні 15-20 м/с болады.

Алматы облысында оңтүстігінде, шығысында және таулы аудандарында оңтүстік-шығыс желі оңтүстік-батысқа ауысады. Желдің екпіні 18-23 м/с болады. Батысында, оңтүстігінде және шығысында өрт қаупі жоғары деңгейде сақталады.

Алматы қаласында өрт қаупі жоғары деңгейде сақталады. Қонаевта оңтүстік-шығыс желі оңтүстік-батысқа ауысып, кей уақытта екпіні 18-23 м/с болады. Қалада өрт қаупі жоғары деңгейде сақталады. Іле Алатауының таулы аймақтарында (Алматы қаласының Медеу және Бостандық аудандарының таулы бөліктері) оңтүстік-шығыс желі оңтүстік-батысқа ауысады. Күндіз желдің екпіні 18 м/с болады.

Жетісу облысында түнде және таңертең таулы аудандарда тұман түседі. Алакөл көлдері ауданында оңтүстік-шығыс желі соғып, жылдамдығы 15-20 м/с, екпіні 23-28 м/с болады. Кей уақытта желдің екпіні 30 м/с-тан және одан да жоғары болуы мүмкін. Оңтүстігі мен орталығында өрт қаупі жоғары, шығысында төтенше деңгейде сақталады. Талдықорғанда өрт қаупі жоғары деңгейде сақталады.

Жамбыл облысында таулы аудандарда тұман түседі. Оңтүстік-батысында, солтүстік-шығысында және таулы аудандарында оңтүстік-шығыс желі оңтүстік-батысқа ауысып соғады. Желдің жылдамдығы 15-20 м/с, күндіз екпіні 23-28 м/с болады. Солтүстігінде, оңтүстігінде және шығысында өрт қаупі жоғары деңгейде сақталады. Таразда оңтүстік-шығыс желі оңтүстік-батысқа ауысады. Таңертең және күндіз желдің екпіні 15-20 м/с, кей уақытта 25 м/с болады. Өрт қаупі жоғары деңгейде сақталады.

Түркістан облысында жаңбыр жауады. Түнде батысында, солтүстігінде және оңтүстігінде, күндіз бүкіл облыс аумағында жауын-шашын күтіледі. Батысында, оңтүстігінде және таулы аудандарында қатты жаңбыр жауады. Батысында найзағай ойнайды. Түнде және таңертең солтүстігінде және таулы аудандарында тұман түседі. Батысында, солтүстігінде, оңтүстігінде және таулы аудандарында оңтүстік-шығыс желі соғып, жылдамдығы 15-20 м/с, екпіні 23 м/с болады. Батысында өрт қаупі төтенше деңгейде, солтүстігі мен оңтүстігінде жоғары деңгейде сақталады. Шымкентте оңтүстік-шығыс желі соғып, таңертең және күндіз екпіні 15-20 м/с болады. Түркістанда жаңбыр жауып, найзағай ойнайды. Күндіз кей уақытта қатты жаңбыр жауады. Оңтүстік-шығыс желінің екпіні 15-20 м/с болады. Өрт қаупі төтенше деңгейде сақталады.

Қызылорда облысында күндіз шығысында қатты жаңбыр жауады. Шығысы мен орталығында тұман түседі. Күндіз солтүстігінде солтүстік-батыс және солтүстік жел соғып, екпіні 15-20 м/с болады. Облыс аумағында өрт қаупі төтенше деңгейде, солтүстігінде жоғары деңгейде сақталады. Қызылордада түнде және таңертең тұман түсіп, өрт қаупі төтенше деңгейде болады.

Ақтөбе облысында түнде оңтүстігі мен шығысында жаңбыр мен қар жауып, көктайғақ болады. Солтүстік-батыс желі соғып, күндіз оңтүстігі мен шығысында екпіні 15-18 м/с-қа жетеді. Шығысы мен оңтүстігінде өрт қаупі төтенше деңгейде сақталады.

Атырау облысында түнде және таңертең батысында, солтүстігінде және оңтүстігінде тұман түседі. Солтүстік-батысында өрт қаупі жоғары деңгейде сақталады. Атырауда түнде және таңертең тұман болады.

Маңғыстау облысында түнде батысында, солтүстігінде және орталығында жауын-шашын, негізінен жаңбыр жауады. Батысы мен солтүстігінде тұман түседі. Батысы мен орталығында солтүстік жел соғып, екпіні 15-20 м/с болады. Ақтауда түнде кей уақытта тұман күтіледі.

Батыс Қазақстан облысында түнде және таңертең батысында, солтүстігінде және шығысында тұман түсіп, көктайғақ болады. Оралда түнде және таңертең тұман мен көктайғақ күтіледі.