«Әр күлкі – жан жарасын жасыру»: Салтанат Нүкенованың ағасы жүрек тебірентер жазба жариялады

Қайтыс болған Салтанат Нүкенованың ағасы отбасының оның қазасына үш жыл толар тұстағы көңіл күйі туралы айтты. Қайғылы күн қарсаңында марқұмның жақындары оның өмірінің соңғы күні өткен жерге барып, гүл шоқтарын қойған, деп хабарлайды Azattyq Rýhy.

Салтанаттың ағасы әлеуметтік желіде жазба жариялап, осы күндердің жақындауы әлі де бүкіл отбасы үшін ауыр сынақ екенін мойындады. Оның айтуынша, жақындары жыл сайын 9 және 11 қараша күндері болған қайғылы оқиғаны дәл кеше болғандай қайта-қайта бастан өткергісі келмейді. Сондықтан отбасы бұл күндерге байланысты біртіндеп жаңа естеліктер қалыптастыруды ұйғарған.

«9 және 11 қараша біз үшін өте ауыр күндерге айналды. Бірақ алда әлі талай жыл бар, сол жылдардың әрқайсысында 9 және 11 қараша қайта келеді. Мен бүкіл отбасымның жыл сайын осы күндері тұңғиыққа құлдилап, сол қайғыны қайта кешкенін қаламаймын. Сондықтан бұл күндерге қатысты жаңа естеліктер қалыптастыра бастағым келеді. Бүгін – 8 қараша. Бұл – Салта бізбен бірге болған соңғы күн. Бүгін біз Салтаға оның қайтыс болған күніне емес, өмірінің соңғы күніне орай барамыз. Осы күнге дейінгі екі аптаға жуық уақыт – ұйқысыз түндер мен көз жасына толы кезең. Біз мұны сыртқа шығармаймыз, бірақ жанымызда сақтап келеміз. Жақындарымыз бен жағдайды түсінетін адамдар үшін бұл уақыттың оңай емес екені онсыз да түсінікті. Ал біздің күлкіміздің бәрі – жан жарасынан қашудың амалы», – деп жазды Салтанаттың ағасы.

Оның айтуынша, ең ауыр сәттердің өзінде өмір жалғаса береді. Жақындары осы қайғымен өмір сүруді үйренуге мәжбүр.

«Мұндай күндері өмір сүргің келетін сезім ерекше күшейеді. Өмірдің қаншалықты нәзік әрі болжауға келмейтінін терең түсінесің. Бұл күндері тыныс алудың өзі ауыр. Бірақ жан жарасына қарамастан, жаңа күн туады. Біз одан ешқайда қаша алмаймыз. Бүгін оның жарқын өмірінің соңғы күнін еске алып, гүл апарып қойдық. Жүрегіміз мұңға толы», – деді Салтанаттың ағасы.

Еске салайық, бұрынғы ұлттық экономика министрі Қуандық Бишімбаев азаматтық некедегі әйелі Салтанат Нүкенованы өлтіргені үшін 24 жылға сотталды. Қылмыс 2023 жылы 9 қарашада елорданың сол жағалауындағы мейрамханада жасалған болатын.