Еліміздің екі қаласында ауа сапасы нашарлайды
Синоптиктер атмосфераның төменгі қабатында зиянды заттардың жиналуы салдарынан ауа сапасы төмендейтінін ескертті
2026 жылдың 4 қазанында Алматы мен Атырау қалаларында қолайсыз метеорологиялық жағдайлар сақталады. Синоптиктер атмосфераның төменгі қабатында зиянды заттардың жиналуы салдарынан ауа сапасы төмендейтінін ескертіп, тұрғындарды сақтық шараларын сақтауға шақырды, деп хабарлайды Azattyq Rýhy «Қазгидрометке» сілтеме жасап.
Қолайсыз метеорологиялық жағдайлар – бұл атмосфераның төменгі қабатында зиянды заттардың жиналуына ықпал ететін қысқа мерзімді факторлардың жиынтығы. Мамандардың мәліметінше, бұл қалаларда баяу жел, инверсия және тұман сияқты факторлар бірігіп, жерге жақын қабатта ластаушы заттардың шоғырлануына әкеп соғады. Мұндай жағдай адам денсаулығына тікелей әсер етуі мүмкін.
Ауаның ластануы кезінде мамандар келесі ережелерді сақтауды ұсынады:
1.Тас жолдар мен өндіріс орындарына жақын жерде ұзақ жүрмеген абзал.
2.Өкпе, жүрек-қан тамырлары аурулары бар және аллергияға бейім жандар өзімен бірге қажетті дәрі-дәрмектерін алып жүруі тиіс.
3.Таза ауада спортпен шұғылдануды немесе ауыр физикалық жұмыс істеуді уақытша тоқтата тұрған жөн.
