Сенбеңіздер: Қаржылық мониторинг агенттігі алаяқтардың былығын әшкереледі

Қазақстанда алаяқтар Қаржылық мониторинг агенттігінің атынан жалған ресми хаттар таратып, алдап жатыр. Ведомство осыған байланысты қазақстандықтарға ескерту жасады, деп жазады Azattyq Rýhy.

Қаржылық мониторинг агенттігі осындай жалған хаттардың біріне қатысты ақпарат түскенін хабарлады.

«Мемлекеттік органға жолданған хатта қаскөйлер тексеру жүргізіліп жатқанын алға тартып, азамат туралы мәліметтерді, соның ішінде оның мінездемесі мен өзге де ақпаратты сұратқан. Бұған дейін де алаяқтар осыған ұқсас тәсілді қолданған. Олар жалған хаттарды жібергеннен кейін азаматтарға телефон немесе мессенджер арқылы хабарласып, өздерін ҚМА қызметкерлері ретінде таныстырған. Түрлі сылтаумен азаматтардың жеке және банк деректерін алуға тырысқан немесе ақша бопсалаған», – делінген ведомство хабарламасында.

Қаржылық мониторинг агенттігі мұндай хабарламалар алаяқтардың ісі екенін ескертті.

• Агенттіктің ресми хаттары тек белгіленген тәртіппен жолданады;
• ҚМА қызметкерлері телефон арқылы банк шоттарының деректерін беруді немесе ақша аударуды талап етпейді;
• құжатта логотип, мөр немесе қолтаңба бар екеніне ғана сүйеніп, оған сенуге болмайды;
• күмәнді хат алсаңыз, оның шынайылығын Агенттіктің ресми байланыс арналары арқылы тексеріңіз.

«Танымайтын адамдарға жеке және банк деректеріңізді бермеңіз, олардың нұсқауымен ақша аудармаңыз. Күмән туындаған жағдайда ҚМА-нің 1458 нөмірлі Call-орталығына немесе +7 (7172) 70-84-79 телефоны арқылы кезекші бөлімге хабарласыңыз. ҚМА азаматтар мен ұйымдарды сақ болуға және алаяқтардың айласына түспеуге шақырады», – делінген ведомство хабарламасында.