«Байтақ» кандидаты медицина қызметкерлерімен экология және денсаулық сақтау мәселесін талқылады

Қазақстанның «Байтақ» жасылдар партиясынан Құрылтай сайлауына кандидат Айман Сексенова Ақтөбе облыстық жұқпалы аурулар ауруханасында болып, медицина қызметкерлерімен кездесті. Жиында қоршаған ортаның жай-күйінің халық денсаулығына әсері сөз болды, деп хабарлайды Azattyq Rýhy партияның ббаспасөз қызметі.

«Экология мен медицина тығыз байланысты. Таза ауа, сапалы су және қауіпсіз орта – халық денсаулығының кепілі. Сондықтан «Байтақ» партиясы денсаулық сақтау саласымен бірлесіп, экологиялық мәдениетті арттыруға және аурудың алдын алуға бағытталған бастамаларды қолдайды», -- деп атап өтті кандидат.

Кездесу барысында Ақтөбе облысындағы медициналық мекемелердің көбінде «Байтақ» партиясының бастауыш партия ұйымы құрылғаны айтылды. Бұл – қоғамдық денсаулық, экологиялық қауіпсіздік және тұрғындардың өмір сүру сапасын жақсартуға бағытталған бастамаларды медицина қауымдастығымен бірлесіп жүзеге асыруға мүмкіндік береді.

Тараптар экология мен денсаулық сақтау саласының өзара ықпалдастығын күшейту – өңірдің ғана емес, тұтас елдің тұрақты дамуы үшін маңызды екенін атап өтті.