«Бәйтерек» монументінің авторы дүниеден озды

Белгілі сәулетші, «Астана-Бәйтерек» монументінің авторы, Қазақстан сәулетшілер одағының президенті Ақмырза Рүстембеков 64 жасында қайтыс болды. Қаралы хабарды «Алматыгенплан» ғылыми-зертту институтының баспасөз қызметі жеткізді.

Ақмырза Рүстембеков – Қазақстан Республикасының еңбек сіңірген қайраткері, Қазақстанның құрметті сәулетшісі, Шығыс елдерінің халықаралық сәулет академиясының корреспондент-мүшесі, Қазақ бас сәулет-құрылыс академиясының құрметті профессоры, Ресей сәулетшілер одағының құрметті мүшесі, Қазақстан дизайнерлер одағының мүшесі.

«Астана-Бәйтерек» нысаны үшін ол ТМД елдерінің сәулетшілер одағының Халықаралық қауымдастығының X-ші халықаралық байқауында Гран-при мен алтын медальға ие болған. 2003 жылы Софиядағы Бүкіләлемдік сәулет Триенналының күміс медалін, 2003 жылы Бішкектегі Сәулет фестивалінде Гран-при және Қырғыз Республикасы Сәулетшілер одағының алтын медалін иеленген.