Партияның өңірлік филиалы сондай-ақ облыс тұрғындарын осы жұмысқа белсенді түрде атсалысуға шақырды
Қазақстанның «Байтақ» жасылдар партиясының Павлодар облыстық филиалы өңірдегі экологиялық жағдайға қатысты ресми сауалдар дайындауға кірісті. Құжаттар мемлекеттік органдарға және облыстың ірі өнеркәсіп кәсіпорындарына жолданады, деп хабарлайды Azattyq Rýhy партияның баспасөз қызметіне сілтеме жасап.
Партияның облыстық филиалының төрағасы Думан Токашевтың айтуынша, сауалдарда табиғатты қорғау заңнамасының сақталуы, өндірістерді экологиялық жаңғырту, қоршаған ортаға теріс әсерді азайту шаралары және басқа да өзекті экологиялық тақырыптар қамтылады.
Партияның өңірлік филиалы сондай-ақ облыс тұрғындарын осы жұмысқа белсенді түрде атсалысуға шақырды.
«Егер сізде экологияға қатысты ұсыныстар немесе сұрақтар болса, оларды партияның әлеуметтік желілердегі ресми парақшалары арқылы жолдаңыз. Бірде-бір өтініш назардан тыс қалмайды. Түскен барлық ұсыныстар қаралып, мемлекеттік органдарға және ірі кәсіпорындар басшылығына жолданатын ресми сауалдар тізіміне енгізіледі. Экологиялық қауіпсіздік — әрбір тұрғынның ортақ міндеті. Қоғам, бизнес және мемлекет күш-жігерін біріктіргенде ғана нақты өзгерістерге қол жеткізуге болады», -- филиал басшысы атап өтті.