Алматыда карантин талаптарын сақтамаған 1000-нан астам адамға айыппұл салынды

Алматыда 1000 астам адамға карантин талаптарын сақтамағаны үшін айыппұл салынды. Бұл туралы Polisia.kz хабарлайды.

Азаматтардың санитарлық-эпидемиологиялық салауаттылығы саласындағы заңнаманың, сондай-ақ гигиена стандарттарының сақталуын бақылау мақсатында Алматы қаласы әкімдігі, СЭС және полиция қызметкерлерінің арасынан арнайы мониторингтік топтар құрылды.

5 шілдеден бастап Әкімшілік құқық бұзушылық туралы кодекстің 425-бабына сәйкес әкімшілік жауапкершілікке 1 мың 22 адам тартылды. Ал, кеше 90 адамға хаттама толтырылды.

«Халық көп келетін, қызмет көрсету, тамақтану орындары және басқалары үнемі тексеріліп отырады. Сонымен қатар, санитарлық дәрігердің талаптарына сәйкес келмейтін массаж, сұлулық салондары, барлар, мейрамханаларды анықтау бойынша жедел бөлімшелер жұмыс істейді. Арнайы рейдтер барлық жерде және тұрақты негізде жүргізіліп отырады», – деді Алматы қалалық ПД Жергілікті полиция қызметі басқармасының бастығы Манап Саттаров.