Алматыдан Дубайға жоспарланған тағы бір рейс тоқтатылды
Таяу Шығыстағы жағдайдың шиеленісуіне байланысты Air Astana Дубай бағытындағы рейстер кестесіне өзгеріс енгізді. 12 шілде күні Астанадан ұшқан әуе кемесі әуеде кері бұрылып, елорда әуежайына қайтарылды. Алматыдан Дубайға жоспарланған тағы бір рейс тоқтатылды, деп хабарлайды Azattyq Rýhy.
Air Astana мәліметінше, KC205 Астана – Дубай рейсі 12 шілде күні сағат 07:10-да елордадан ұшып шыққан.
Алайда ұшақ межелі жерге жетпей, әуеде кері бұрылған. Әуе кемесі Астана әуежайына қайтарылды.
Компания бұл өзгерісті Таяу Шығыстағы жағдайдың ушығуымен байланыстырып отыр.
Сонымен қатар сағат 08:50-де ұшуы тиіс KC897 Алматы – Дубай рейсі тоқтатылған.
Әуе компаниясы жолаушыларға билет құнын сатып алған жері бойынша толық қайтаруға уәде берді.
Air Astana аймақтағы жағдайды мұқият бақылап отырғанын және жолаушыларды тасымалдау мәселесін қарастырып жатқанын мәлімдеді.
Рейс кестесіндегі алдағы өзгерістер туралы қосымша ақпарат беріледі.
Жолаушыларға әуежайға бармас бұрын рейс мәртебесін алдын ала тексеру ұсынылды. Ұшу және қону уақытында жаңа өзгерістер болуы мүмкін.
Айта кетейік, 12 шілдеге қараған түні АҚШ пен Иран қайтадан өзара соққы жасады. Тегеран шиеленіске контейнер кемесінің «рұқсат етілмеген бағытпен» жүруі себеп болғанын мәлімдеді.