Көлік ішінде 1992, 1995 және 1998 жылғы үш ер адам болған
Батыс Қазақстан облысында ішінде адамдары бар жеңіл автокөлік суға толы терең жыраға құлап, төтенше жағдай болды. Оқиға орнына жеткен құтқарушылар азаматтарды шұғыл эвакуациялады, деп хабарлайды Azattyq Rýhy.
Төтенше жағдайлар министрлігінің таратқан ресми мәліметіне сәйкес, оқиға таңертең ерте уақытта Бітік су қоймасынан қашық емес жерде тіркелген. Алдын ала болжам бойынша, жол талғамайтын көліктің жүргізушісі тізгінге ие бола алмай, жолдан шығып кеткен. Салдарынан ішінде жолаушылары бар көлік суға толы жыраның түбіне бір-ақ түскен.
Оқиға туралы хабарлама түскен бойда апат орнына құтқару бөлімшелері жедел жетті.
Құтқару қызметі тарапынан бірқатар жедел жұмыс атқарылды. Алдымен мамандар су ортасында қалып қойған көліктегі азаматтардың қауіпсіз түрде сыртқа шығуына көмектесті. Одан кейін арнайы техниканың көмегімен жол талғамайтын көлік жырадан шығарылып, жолдың қауіпсіз бөлігіне сүйреп жеткізілді.
«Көлік ішінде 1992, 1995 және 1998 жылғы үш ер адам болған. Олардың ешқайсысы зардап шеккен жоқ, медициналық көмек қажет болмады», — деп хабарлады ТЖМ баспасөз қызметі.