26 мамырда бірнеше өңірде дауылды ескерту жарияланды

26 мамырда Қазақстанның 15 өңірінде дауылды ескерту жарияланды. Синоптиктер бірқатар облыста жаңбыр, найзағай, дауылды жел мен 2 градусқа дейін үсік болатынын болжады. Сонымен қатар елдің басым бөлігінде жоғары және төтенше өрт қаупі сақталады, деп хабарлайды Azattyq Rýhy «Қазгидрометке» сілтеме жасап.

Ақмола облысының батысында, солтүстігінде және оңтүстігінде күндіз жаңбыр мен найзағай күтіледі. Облыстың кей бөліктерінде жоғары, ал оңтүстік-шығысында төтенше өрт қаупі сақталады. Көкшетауда да күндіз жаңбыр жауып, найзағай ойнайды.

Солтүстік Қазақстан облысында түнде шығыста аздаған жаңбыр мен найзағай болжанса, күндіз өткінші жаңбыр жауады. Кей аудандарда дауыл соғып, жел екпіні секундына 15–20 метрге жетеді. Петропавлда да найзағай мен қатты жел күтіледі.

Қостанай облысының солтүстігі мен шығысында күндіз жаңбыр мен найзағай болады. Өңірдің бірқатар бөлігінде жоғары өрт қаупі сақталады.

Павлодар облысының батысы, солтүстігі және оңтүстігінде жаңбыр жауып, найзағай күтіледі. Желдің екпіні 15–20 м/с дейін жетуі мүмкін. Облыстың шығысында төтенше өрт қаупі сақталады.

Қарағанды облысының солтүстігінде аздаған жаңбыр мен найзағай, шығысында жаңбыр күтіледі. Кей аудандарда жоғары және төтенше өрт қаупі сақталып отыр. Қарағанды қаласында да төтенше өрт қаупі жарияланған.

Ұлытау облысында жел күшейеді. Өңірдің шығысы, оңтүстігі мен орталығында төтенше өрт қаупі сақталады.

Шығыс Қазақстан облысының солтүстігінде түнде тұман түседі. Солтүстік және шығыс аудандарда 2 градусқа дейін үсік жүруі мүмкін.

Абай облысының оңтүстігінде шаңды дауыл күтіледі. Жел екпіні 15–20 м/с дейін жетеді. Кей аудандарда жоғары және төтенше өрт қаупі сақталады.

Алматы облысының таулы және тау бөктеріндегі аудандарында күндіз жаңбыр мен найзағай болады. Желдің екпіні 18 м/с дейін жетуі ықтимал. Іле Алатауы тауларында да күннің екінші жартысында жаңбыр жауып, найзағай күтіледі.

Жетісу облысында Алакөл көлдері ауданында жел күшейеді. Өңір бойынша жоғары, ал шығысында төтенше өрт қаупі сақталып отыр.

Жамбыл облысының таулы аудандарында түнде, ал оңтүстігі мен таулы бөліктерінде күндіз жаңбыр мен найзағай болжанады. Кей жерлерде тұман түсіп, жел екпіні 15–20 м/с дейін жетеді.

Түркістан облысының таулы және тау бөктеріндегі аудандарында өткінші жаңбыр мен найзағай күтіледі. Кей бөліктерде жел күшейеді. Облыстың солтүстігінде төтенше өрт қаупі сақталады.

Ақтөбе облысының солтүстік-батысында күннің екінші жартысында аздаған жаңбыр мен найзағай болады. Өңірде жоғары және төтенше өрт қаупі сақталып отыр.

Атырау облысының батысы, солтүстігі және шығысында жаңбыр мен найзағай күтіледі. Кей аудандарда шаңды дауыл соғып, жел екпіні 15–20 м/с дейін жетеді. Атырау қаласында да шаңды дауыл болжанып отыр.

Батыс Қазақстан облысының батысында түнде, ал батысы, солтүстігі және оңтүстігінде күндіз жаңбыр мен найзағай болады. Оралда жел күшейіп, өрт қаупі сақталады.