Найзағай, бұршақ, дауылды жел: 3 мамырда Қазақстанда ауа райы күрт өзгереді

3 мамырда Қазақстанның бірқатар өңірінде ауа райы күрт нашарлайды деп күтілуде. Синоптиктер найзағай, дауылды жел, нөсер жаңбыр және тіпті үсік болуы мүмкін екенін ескертеді, деп хабарлайды Azattyq Rýhy «Қазгидрометке» сілтеме жасап.

Алматы қаласында күннің екінші жартысында қатты жаңбыр жауып, күндіз найзағай күтіледі. Батыстан соққан желдің екпіні 15–18 м/с дейін жетеді. Іле Алатауы тауларында жағдай күрделірек: күндіз нөсер жаңбыр, найзағай, бұршақ жаууы мүмкін, сондай-ақ жел екпіні 25 м/с-қа дейін күшейеді.

Шымкент қаласында 3 мамырда кей уақытта жаңбыр жауып, найзағай ойнайды, дауылды жел соғады. Желдің бағыты солтүстік-батыстан солтүстік-шығысқа ауысып, екпіні 15–20 м/с-қа жетеді.

Қостанай облысында таңертең және күндіз батыс пен солтүстікте өткінші жаңбыр жауып, найзағай болады, ал түнде және таңертең тұман түсуі мүмкін.

Қарағанды облысының оңтүстігі мен шығысында да жаңбыр мен найзағай күтіледі. Солтүстік және солтүстік-шығыстан соғатын желдің екпіні 20 м/с-қа дейін жетеді. Бұл ретте облыстың батысында, солтүстігінде және оңтүстігінде өрт қаупі жоғары деңгейде сақталады.

Павлодар облысының батысында түнде 1 градусқа дейін үсік жүруі мүмкін. Облыстың солтүстігінде, батысында және шығысында жоғары өрт қаупі сақталады.

Шығыс Қазақстан облысының батысында да жоғары өрт қаупі сақталады.

Жамбыл облысында ауа райы қолайсыз болады: батысында, солтүстік-батысында, оңтүстігінде және таулы аймақтарда жаңбыр, найзағай, бұршақ, дауылды жел күтіледі, кей жерлерде нөсер жауын жауады. Тауда түнде және таңертең тұман түсуі мүмкін. Солтүстік-батыстан соққан желдің екпіні 20 м/с-қа дейін жетеді.

Маңғыстау облысының батысы мен орталығында түнде және таңертең тұман күтіледі.

Ақмола облысының солтүстігі мен шығысында түнде және таңертең тұман болады, ал батысында 2 градусқа дейін үсік жүруі мүмкін.

Түркістан облысында жаңбыр, найзағай және дауылды жел күтіледі, таулы және тау бөктеріндегі аудандарда нөсер жауын мен бұршақ жаууы ықтимал. Солтүстік-батыстан соққан жел кейін солтүстік-шығысқа ауысып, екпіні 20 м/с-қа дейін жетеді.

Алматы облысының тау бөктері мен таулы аудандарында күндіз қатты жаңбыр, бұршақ, дауылды жел және найзағай күтіледі. Батыстан соққан желдің екпіні 25 м/с-қа дейін жетеді.

Атырау облысының батысы мен солтүстігінде жаңбыр жауып, найзағай болады. Оңтүстік-шығыстан соққан желдің екпіні оңтүстікте 20 м/с-қа дейін жетеді.

Ақтөбе облысының батысы мен солтүстігінде күндіз өткінші жаңбыр мен найзағай күтіледі. Жел солтүстік-шығыстан оңтүстікке ауысып, екпіні 18 м/с-қа дейін жетеді. Облыстың оңтүстігінде өрт қаупі жоғары деңгейде сақталады.

Солтүстік Қазақстан облысында желдің жылдамдығы 20 м/с-қа дейін күшейеді, түнде 1 градусқа дейін үсік жүруі мүмкін. Облыстың батысында жоғары өрт қаупі сақталады.

Абай облысының Аягөз ауданында солтүстік-шығыс желі 20 м/с-қа дейін күшейеді. Облыстың шығыс, оңтүстік және орталық бөліктерінде жоғары өрт қаупі сақталады.

Жетісу облысының таулы аймақтарында күндіз жаңбыр мен найзағай күтіледі, шығыстан соққан желдің екпіні 20 м/с-қа дейін жетеді. Облыстың оңтүстігі мен оңтүстік-шығысында төтенше өрт қаупі жарияланған.

Ұлытау облысының оңтүстігінде түнде және таңертең жаңбыр мен найзағай болжанып отыр. Солтүстік-шығыстан соққан желдің екпіні 18 м/с-қа дейін жетеді. Облыстың шығыс бөлігінде өрт қаупі жоғары деңгейде сақталады.

Батыс Қазақстан облысының батысында, солтүстігінде және шығысында жаңбыр мен найзағай күтіледі, кей жерлерде тұман түседі. Солтүстік-шығыстан соққан желдің екпіні 20 м/с-қа дейін жетеді.

Қызылорда облысының шығысы мен орталығында жаңбыр жауып, найзағай болады, күндіз шаңды дауыл мен дауылды жел болуы мүмкін. Солтүстік-шығыс және шығыстан соққан желдің жылдамдығы 20 м/с-қа дейін жетеді. Өңірде жоғары өрт қаупі сақталады.