Алматыда қызметтік өкілеттілігін асыра пайдаланған офицер сотталды
Ол енді екі жыл бойы бостандығын шектеу жазасын өтейді
Алматы гарнизонының әскери соты қарамағындағы сарбазға билігін асыра пайдаланған офицерге қатысты үкім шығарды. Жоғары шенді әскери қызметші енді екі жыл бойы бостандығын шектеу жазасын өтейді, деп хабарлайды Azattyq Rýhy.
Сот деректеріне сәйкес, офицер өзінің лауазымдық өкілеттігін теріс пайдаланып, қол астындағы қызметкерге менсінбеушілік танытқан. Ол сарбазға күш көрсетіп, оны демалыс уақытында заңсыз жұмыстарға жеккені анықталды.
«Сотталушы өз кінәсін толық мойындап, жасаған ісіне өкінетінін жеткізді. Сондай-ақ ол жәбірленушіге келтірілген материалдық және моральдық шығынды өтеуге дайын екенін мәлімдеді», — делінген ресми хабарламада.
Сот барысында прокурор 3 жылға бас бостандығын шектеуді сұраса, қорғаушы тарап жазаны 1,5 жылға дейін азайтуды өтінді. Жәбірленуші тарап офицерді заң шеңберінде ең қатаң жазаға тартуды талап етті.
Сот шешім қабылдау кезінде сотталушының кінәсін мойындауын ескергенімен, әскери антты бұзуын ауыр қылмыс ретінде қабылдады. Нәтижесінде офицер 2 жылға бостандығын шектеу жазасына кесілді. Бұған қоса, сот оны «аға лейтенант» әскери шенінен айырды.
Қазіргі таңда сот шешімімен жәбірленушінің пайдасына материалдық және моральдық өтемақы өндірілді. Үкім әлі заңды күшіне енген жоқ.
Көп оқылған
