Балалар күніне демалыс қашан беріледі? Министрлік ұстанымы

Қазақстанда Балаларды қорғау күніне қосымша демалыс беру мәселесі биыл қаралмайды, деп хабарлайды Azattyq Rýhy.

Бұл туралы Сенат кулуарында Еңбек және халықты әлеуметтік қорғау министрі Асқарбек Ертаев мәлімдеді. Оның айтуынша, бастама күн тәртібінен алынып, тек 2027 жылы қайта қаралуы мүмкін.

Министрдің мәліметінше, бұл мәселе бірнеше мемлекеттік органның ортақ ұстанымы қалыптасқаннан кейін ғана шешімін табады. Қазіргі таңда тиісті келісімдер толық пысықталмаған.

Сонымен қатар, ведомство қоғам тарапынан сұраныс бар екенін жоққа шығармайды. Алайда қосымша демалыс күнін енгізу жұмыс берушілерге қосымша жүктеме түсіретін фактор ретінде қарастырылып отыр. Сондықтан бастама тек әлеуметтік серіктестермен және бизнес өкілдерімен жан-жақты талқыланғаннан кейін ғана нақты шешімге келеді.

Министрлік ұстанымына сәйкес, егер экономикалық есептер мен тараптардың келісімі толық қамтамасыз етілсе, Балаларды қорғау күнін демалыс күні ретінде белгілеу мәселесі қолдау табуы мүмкін. Бірақ 2026 жылы бұл өзгеріс енгізілмейді.