Қазақстанда ұлттық қауіпсіздік бағытында кешенді шаралар жүзеге асты

Ұлттық қауіпсіздік комитетінің сыбайлас жемқорлыққа қарсы іс-қимыл қызметі мемлекеттік қызметтер көрсету саласындағы заңдылықты қамтамасыз ету және сыбайлас жемқорлық тәуекелдерін азайту бағытындағы жүйелі жұмыстарын жалғастырып жатыр, деп хабарлайды Azattyq Rýhy.

Ұлттық қауіпсіздік – мемлекеттің тұрақтылығы мен қоғамның тыныс-тіршілігін қамтамасыз ететін негізгі тіректердің бірі. Ол тек сыртқы қауіп-қатерлерден қорғанумен ғана шектелмей, ішкі тұрақтылықты, заң үстемдігін және азаматтардың құқықтары мен бостандықтарының қорғалуын қамтитын кешенді ұғым болып табылады.

Осы тұрғыда ұлттық қауіпсіздік комитеті ел қауіпсіздігін қамтамасыз ету бағытында жүйелі және ауқымды жұмыстар жүргізіп келеді. Әсіресе, мемлекеттік қызметтер көрсету саласындағы сыбайлас жемқорлықпен күрес, заңсыз көші-қонның, контрабанданың және есірткі айналымының алдын алу – ұлттық қауіпсіздіктің маңызды құрамдас бөліктерінің бірі.

2026 жылдың басынан бері жүргізілген жедел-іздестіру және талдау шараларының нәтижесінде Астана қаласында, сондай-ақ Ақмола облысы мен Павлодар облысы аумақтарында автомектептердің қызметін ұйымдастыру және жүргізуші куәліктерін ресімдеу кезінде бірқатар заң бұзу анықталды. Атап айтқанда, заңсыз сыйақы алу, қызметтік өкілеттіктерді теріс пайдалану және емтихан тапсыру рәсімдеріне заңсыз араласу фактілері әшкереленді.

Тергеу барысында Астана қаласындағы мамандандырылған халыққа қызмет көрсету орталығының бұрынғы басшысының орынбасары жүйелі түрде пара алу арқылы азаматтарға теориялық және практикалық емтихандардан кедергісіз өтуге, сондай-ақ жүргізуші куәлігін алуға заңсыз түрде жәрдемдескені анықталды. Қазіргі таңда жалпы сомасы 100 миллион теңгеден асатын 60-тан астам заңсыз әрекет дерегі процестік тұрғыда құжатталған.

Сонымен қатар, Көкшетау қаласындағы Мамандандырылған ХҚКО мен Екібастұз қаласындағы «Азаматтарға арналған үкімет» мемлекеттік корпорациясы филиалы басшыларының заңсыз қызметі тоқтатылды. Олар жалған тұлғаларды пайдалану арқылы жүргізуші куәлігін алу үшін емтихан тапсыруды ұйымдастырып, бұл қызметтері үшін азаматтардан ақша алғаны белгілі болды.

Бұдан бөлек, Шымкент және Тараз қалаларындағы, сондай-ақ Астана қаласындағы «Азаматтарға арналған үкімет» мемлекеттік корпорациясының бірқатар филиалдарында жылжымайтын мүлікті қайта тіркеу, ауыртпалықтарды алып тастау және тіркеу рәсімдерін жеделдету кезінде лауазымды тұлғалардың өз өкілеттіктерін теріс пайдаланып, заңсыз табыс тапқаны анықталды.

Жалпы алғанда, анықталған құқық бұзу мемлекеттік қызмет көрсету саласында ашықтық пен әділдік қағидаттарын бұзуға бағытталған жүйелі сипаттағы сыбайлас жемқорлық тәуекелдерінің бар екенін көрсетеді. Осыған байланысты уәкілетті органдар тарапынан мұндай құқыққа қайшы әрекеттердің жолын кесу, кінәлі тұлғаларды жауапкершілікке тарту және алдын алу шараларын күшейту бағытында тиісті жұмыстар жалғасып жатыр.

Биылғы наурыз айында Қазақстан Республикасы Ұлттық қауіпсіздік комитетінің Шекара қызметі мемлекеттік шекара арқылы заңсыз көші-қонның, контрабанданың және есірткі заттарының таралуының алдын алу бағытында кешенді жедел-профилактикалық іс-шаралар өткізді.

Қабылданған шаралардың нәтижесінде бірқатар заңбұзушылықтардың жолы кесілді. Атап айтқанда, Ақтөбе облысында жүк автокөлігінің тіркемесінде өткізу пунктінен жасырын түрде өтуге әрекеттенген 18 шетел азаматы анықталды. Бұл дерек заңсыз көші-қон арналарын дер кезінде анықтаудың маңыздылығын тағы бір мәрте көрсетті.

Солтүстік Қазақстан облысында синтетикалық есірткілерді дайындауға арналған ірі көлемдегі прекурсорлар партиясы – 5100 литр химиялық зат табылды. Жалпы, жыл басынан бері «Тұз қышқылы», «Ацетон», «Фениппентан» секілді 9 620 литр химиялық зат пен 1000 келі «Бромкетон-4» затының заңсыз тасымалдануының жолы кесілді. Жүргізілген жедел шаралардың арқасында аталған прекурсорлардың соңғы алушылары анықталып, есірткі зертханалары жойылды.

Сонымен қатар, Жамбыл облысында шекарашылар шетелге жалпы құны 1 миллиард теңгеге бағаланатын 160 тонна кен мен бағалы металдар концентраттарын (құрамында алтын бар құм) заңсыз әкету әрекетінің алдын алды.

Аталған барлық фактілер бойынша материалдар тиісті процессуалдық шешім қабылдау үшін құзыретті органдарға жолданды.

Бұдан бөлек, 19 ақпан күні «Сыпатай батыр» автокөлік өткізу пунктінде 150 мың қорап акцизсіз темекіні ел аумағына заңсыз әкелу әрекеті тоқтатылды. Алдын ала есеп бойынша, тәркіленген тауардың құны шамамен 60 миллион теңгені құрайды. Темекі өнімдері автокөлік цистернасының арнайы жасырын бөлігінде жасырылған және жүк тиісті ілеспе құжаттарсыз тасымалданған. Аталған дерек бойынша материалдар тергеу бағыты бойынша құзырлы органға берілді.