Трамптың шешімі нарықты шайқалтты: мұнай бағасы бір сәтте 14% құлдырады

АҚШ президенті Дональд Трамптың Иранға қатысты мәлімдемесінен кейін әлемдік мұнай нарығында баға күрт құлдырады, деп хабарлайды Azattyq Rýhy.

Лондондағы ICE биржасында Brent маркалы мұнайдың маусымдық фьючерстері 23 наурыз күні Мәскеу уақытымен 14:08-де 13,65%-ға төмендеп, барреліне 91,89 долларды құрады. Алайда 14:32-де нарықтағы қысым бәсеңдеп, баға 6,23%-ға дейін төмендеп, 99,79 доллар деңгейіне қайта көтерілді.

Бағаның мұндай құбылуына АҚШ президентінің Иранға қатысты шешімі себеп болды. Ақ үй басшысы Тегеранмен келіссөздерді жалғастыру мақсатында Иранның электр станциялары мен энергетикалық инфрақұрылымына бағытталуы мүмкін әскери соққыларды 5 күнге шектеуді тапсырған.

Бұған дейін, 22 наурызда, Дональд Трамп Иран Ормуз бұғазын 48 сағат ішінде ашпаса, елдің энергетикалық нысандарына соққы жасалатынын мәлімдеген еді. Өз кезегінде Тегеран АҚШ-тың өңірдегі энергетикалық және ақпараттық инфрақұрылымына жауап соққы беретінін ескерткен.

23 наурызда Иран тарапы АҚШ құрлықтағы операция бастаса, Парсы шығанағындағы теңіз жолдарын миналауы мүмкін екенін мәлімдеді. Сонымен қатар, The Wall Street Journal басылымының жазуынша, Вашингтон Иранның оңтүстік жағалауына жақын аралдарды бақылауға алу үшін теңіз жаяу әскерін қолдану нұсқасын қарастырып жатыр.

Иран президенті Масуд Пезешкиан АҚШ-пен келіссөздер жүріп жатыр деген ақпаратты жоққа шығарып, қазіргі байланыс тек Таяу Шығыс елдерімен Ормуз бұғазы арқылы кеме қозғалысын үйлестіруге бағытталғанын мәлімдеді.

Goldman Sachs сарапшыларының бағалауынша, егер Ормуз бұғазы арқылы мұнай жеткізілімі бір айдан астам уақытқа шектелсе, Brent бағасы 2008 жылғы 147,5 долларлық тарихи максимумнан да асып кетуі мүмкін. Бұл – Таяу Шығыстағы геосаяси тәуекелдердің нарыққа әсері әлі де жоғары екенін көрсетеді.