«Прогресс МС-33» кемесі Байқоңырдан Халықаралық ғарыш станциясына ұшты

22 наурыз күні Астана уақытымен сағат 17:00-де Байқоңыр ғарыш айлағынан «Союз-2.1а» зымыран-тасығышы «Прогресс МС-33» жүк кемесімен бірге ұшырылды, деп хабарлайды Azattyq Rýhy.

«Роскосмос» мемлекеттік корпорациясының ресми Telegram-арнасы таратқан мәліметке сәйкес, орбитаға шығару қалыпты режимде өтті: кеме зымыранның үшінші сатысынан сәтті ажырап, антенналары мен күн батареялары панельдерін ашты.

Халықаралық ғарыш станциясымен түйісу 24 наурыз күні Астана уақытымен сағат 18:35-ке жоспарланған.

Бұл ұшыру №31 старттық кешені жаңғыртылғаннан кейінгі алғашқысы болды. Аталған алаң ғарыш бағдарламасының негізгі нысандарының бірі саналады.

«Жүк кемесі орбитаға станция экипажының жұмысын қамтамасыз етуге қажетті 2,5 тоннадан астам түрлі жүк жеткізеді. Жалпы көлемнің шамамен үштен бірін – 828 килограмм отын құрайды, ол Халықаралық ғарыш станциясын қосымша жанармаймен қамтамасыз етуге арналған», – деп мәлімдеді «Роскосмос».

Сондай-ақ бортта:

• 420 кг ауыз су;
• 619 кг азық-түлік;
• станцияны жөндеу мен қызмет көрсетуге арналған 393 кг жабдық;
• 135 кг санитарлық-гигиеналық құралдар;
• 52 кг ғылыми аппаратура;
• 50 кг оттегі;
• салмақсыздықтың кері әсерінің алдын алуға арналған арнайы костюмдерді қоса алғанда, 12 кг медициналық құралдар бар.

Миссияның ғылыми бағдарламасына да ерекше көңіл бөлінген. Жүктің ішінде П. Н. Лебедев атындағы Физика институты әзірлеген «Солнце-Терагерц» аппаратурасы бар. Бұл – бұрын толық зерттелмеген терагерц диапазонында Күнді бақылауға арналған радиотелескоп.

Жаңа құралды пайдалану күн жарқылдарының пайда болу тетіктерін нақтылауға мүмкіндік береді деп күтілуде. Күн белсенділігі артқан кезеңдерде күшті магнит өрісі бар аймақтар қалыптасып, жарқылдар мен плазма лақтырылады. Мұндай ағындар Жерге жеткенде магниттік дауылдар туғызып, спутниктердің жұмысына, радиобайланысқа және ионосфера жағдайына әсер етеді, ал адамдар кейде бас ауруына шағымданады.

Қазіргі уақытта Күн белсенділігін дәл болжау қиын: мамандар тек ықтимал қауіпті аймақтарды ғана көрсете алады. «Солнце-Терагерц» арқылы алынатын деректер болжамдардың нақтылығын арттыруға мүмкіндік береді деп болжанып отыр.

Жабдықты станцияның сыртқы бетіне орнату ғарышкерлердің ашық ғарышқа шығуы кезінде жүзеге асырылмақ.