Өскемендегі қазандықта көміртек оксидінің мөлшері төрт есе артқаны анықталды
Экология департаменті Өскемен қаласы бойынша қолайсыз метеорологиялық жағдайлар кезеңінде «Шығыс Жылу» АҚ-ға (№2 қазандық) қатысты жоспардан тыс тексеру жүргізді. Бұл туралы Azattyq Rýhy агенттігі Yk.kz-ке сілтеме жасап хабарлайды.
Тексеру аясында шығарындылар көзіне бақылау өлшемдері жүргізіліп, оның қорытындысы бойынша көміртек оксиді бойынша белгіленген нормативтердің 4 есе артқаны анықталды.
Осылайша, аталған факт шаң-газ ұстайтын жабдықтың пайдаланылған түтін газдарын жобалық деңгейде толық тазартуды қамтамасыз етпейтінін көрсетеді.
Сонымен қатар, қолайсыз метеорологиялық жағдайлар күндері эмиссияларды азайту талаптарының сақталмауы экологиялық рұқсат шарттарының бұзылуына әкеледі.
Тексеру қорытындысы бойынша кәсіпорынға шамамен 3,5 млн теңге көлемінде айыппұл салу түріндегі әкімшілік жауапкершілік жүктелді. Сондай-ақ анықталған заңбұзушылықтарды жою туралы нұсқама берілді.
Экология департаменті өңірде қоршаған ортаға теріс әсер ететін нысандардың қызметін анықтау және жолын кесу бойынша жүйелі жұмыстарды жалғастырып жатыр.