Қостанайда тұрғындар таңертеңнен бастап белсенді дауыс беріп жатыр – бақылаушы

Қазақстанда жаңа Конституция бойынша республикалық референдум аясында дауыс беру жалғасып жатыр. Қостанай қаласындағы «AMANAT» партиясынан бақылаушы Руслана Карлыкова референдум күні өз жұмысы және қала тұрғындарының көңіл-күйі туралы айтып берді, деп хабарлайды Azattyq Rýhy 

Руслананың айтуынша, бақылаушылардың негізгі міндеті – дауыс беру процесінің ашық әрі әділ өтуін қадағалау.

«Мен №11 жалпы білім беретін мектептегі №25 учаскеде бақылаушы болып отырмын. Біздің міндетіміз – дауыс берудің адал, ашық және жария түрде өтуін бақылау. Сондай-ақ ешқандай бұрмалау болмауын, сайлаушылар учаскеге келгенде барлық қажетті құралдарды – бюллетень мен қаламды алып, өз дауысын еркін беруіне жағдай жасалғанын қадағалаймыз», – деді Руслана Карлыкова.

Ол бақылаушылар учаскедегі жұмыстың жалпы ұйымдастырылуын және қандай да бір заң бұзу болмауын да бақылап отыратынын атап өтті.

«Біз учаскеде ешқандай оқыс жағдайдың болмауын қадағалаймыз. Бақылаушылардың негізгі рөлі – дауыс беру процесінің ашық, әділ, жария және дұрыс өтуін бақылау», – деді ол.

Оның айтуынша, бақылаушылар сайлаушылар арасында арнайы сауалнама жүргізбейді, бірақ дауыс беру барысы туралы ақпаратты әлеуметтік желілерде бөлісіп отырады.

Сонымен қатар ол учаскеге келген азаматтардың көңіл-күйіне де тоқталды.

«Азаматтар өте жақсы көңіл-күймен келіп жатыр. Адамдардың белсенді азаматтық ұстанымы бар екені көрінеді, олар дауыс беріп, еліміздегі өзгерістерге қатысуға ниетті. Таңертең ерте, шамамен сағат 07:30-дан бастап учаскеде алғашқы дауыс берушілер пайда болды», – деп қосты Карлыкова.

Бақылаушылардың айтуынша, өңірлердегі көптеген учаскелерде дауыс беру тыныш жағдайда өтіп жатыр, азаматтардың белсенділігі де жоғары.