«Қолым дірілдеп тұр»: Айгүл Иманбаева ұшақта қиын жағдайға тап болды (ВИДЕО)

Қазақстандық актриса әрі әнші Айгүл Иманбаева әуе рейсі кезінде бортсеріктермен жанжалдасып қалды. Оқиға Алматы – Астана бағыты бойынша ұшқан №953 рейсінде болды, деп хабарлайды Azattyq Rýhy.

Өнер иесінің айтуынша, ұшақ боранға байланысты екі сағат кешігіп ұшқан. Оның қасында келіні мен екі немересі болған.

Айгүл Иманбаеваның сөзінше, жанжалға бір стақан су себеп болған. Ол ораза кезінде ауыз ашу үшін бортсеріктерден су әкеліп беруді сұраған. Қызметкерлер бастапқыда келісім бергенімен, ауыз ашар уақытынан шамамен 20 минут бұрын шақыру батырмасын басқанына қарамастан, экипаж мүшелерінің ешқайсысы келмеген.

Актрисаның айтуынша, ұшақ қонуға бет алған кезде бортсеріктердің бірі су әкелуден бас тартып, қонғаннан кейін іше алатынын айтқан.

«Сендер ұялмайсыңдар ма? Қай елде тұрып жатқандарыңды білесіңдер ме? Қазір ораза айы, оны жақсы білесіңдер. Динара, сіздің кесіріңізден қолым дірілдеп тұр», – деп наразылығын білдірді Айгүл Иманбаева.

Өнер иесінің айтуынша, бұл жағдай оның эмоциялық күйіне қатты әсер еткен.

«Бұл масқара жағдай. Мен 20 минут бойы стюардессаны шақырдым, бірақ бір стақан су да ала алмадым. Қолымда кішкентай немерем бар, ол жылап, тынышталмай тұр. Ал маған «қонғаннан кейін өзіңіз келіп ішесіз» дейді. Жүздерінде жасанды күлкі бар, әр жолаушы біз үшін маңызды дейді. Бұл өтірік. Өмірімде алғаш рет осындай жағдайды Instagram-ға салып отырмын, өйткені жүйкем әбден сыр берді», – деп түсіндірді ол.

Сөз соңында актриса әуе компаниясына үндеу жасап:

«Air Astana, сіздерде осындай бортсеріктердің жұмыс істейтіні – ұят», – деп жазды.