Қостанай облысындағы кәсіпорын жүздеген қызметкерінің зейнетақы мен МӘМС жарналарын төлемей келген

Қостанай облысында Қарабалық ауданының прокуратурасы ауданның жекелеген кәсіпкерлік субъектілері тарапынан міндетті зейнетақы және әлеуметтік медициналық жарналардың түспеу фактілерін анықтады, деп хабарлайды Azattyq Rýhy.

Салық органының мәліметінше, кәсіпорындардың бірінде 15 млн теңге сомасына 215 қызметкердің алдында міндетті зейнетақы жарналарын есептеу бойынша берешек, сондай-ақ 2 млн теңге сомасына міндетті әлеуметтік медициналық жарналар бойынша берешек қалыптасты.

«Жалпы аудан аумағында міндетті зейнетақы және әлеуметтік медициналық жарналар бойынша берешек жалпы сомасы 19 млн теңгеден асатын 18 кәсіпкерлік субъектісінде анықталды.

Прокурорлық қадағалау шараларының нәтижесінде 401 қызметкердің алдындағы берешек толық көлемде өтеліп, олардың конституциялық құқықтары қорғалды», – делінген прокуратура хабарламасында.

Прокуратура азаматтардың еңбек және әлеуметтік құқықтарын қорғау прокуратура органдары қызметінің басым бағыттарының бірі болып табылатынын еске салады.