Яна Легкодимованы өлтіргендерге берілген өмір бойы жаза өзгеріссіз қалды

Атырау облыстық сотының қылмыстық істер жөніндегі сот алқасы 23 жастағы Яна Легкодимованы өлтіру ісі бойынша апелляциялық шағымдарды қарап, шығарылған үкімді күшінде қалдырды, деп хабарлайды Azattyq Rýhy.

Сот алқасы бірінші сатыдағы сот шешімін заңды және негізді деп танып, сотталғандарға тағайындалған жаза өзгеріссіз қалдырылғанын мәлімдеді. Осылайша, Ризуан Қайыржанов пен оның танысы Алтынбек Катимовқа қатысты өмір бойына бас бостандығынан айыру туралы үкім күшінде қалды.

Бұған дейін Атырау облысының мамандандырылған ауданаралық қылмыстық соты екеуін де кінәлі деп таныған болатын. Істі қараған судья Зарема Хамидуллина олардың әрекетін ҚР Қылмыстық кодексінің 99-бабы 2-бөлігінің 7 және 8-тармақтары бойынша алдын ала сөз байласу арқылы адамдар тобы болып және жалдамалы негізде жасалған кісі өлтіру, сондай-ақ 202-бабы 2-бөлігінің 6-тармағы бойынша бөтеннің мүлкін қасақана жою ретінде саралаған.

Апелляциялық сатыда қорғау тарапының барлық шағымдары мен өтініштері қанағаттандырусыз қалдырылды. Үкім заңды күшіне енді. Сот шешімі жарияланғаннан кейін марқұмның анасы Галина Легкодимова бұл үкімді істің заңды аяқталуы ретінде қабылдайтынын жеткізді. Оның айтуынша, тергеу мен сот процесі 1 жыл 4 айға созылған, ал осы уақыт ішінде сотталғандар қатаң жаза арқалады деп есептемейді. Енді ғана олар жазасын өтеу орнына жөнелтіледі, осы сәттен бастап әділдік орнады деп санайтынын айтты.

Еске сала кетейік, бұған дейін сотталғандардың адвокаттары апелляциялық шағым түсіріп, үкімді қайта қарауды сұраған еді. Алайда облыстық сот бірінші инстанция шешімін толық көлемде қолдады.