Ұлытау, Павлодар, Ақмола, Абай және Қарағанды облыстарында қозғалысқа уақытша шектеу енгізілді
Еліміздің бірнеше аймағында ауа райының күрт бұзылуына байланысты республикалық маңызы бар автожолдарда қозғалысқа шектеу енгізілді, деп хабарлайды Azattyq Rýhy.
«ҚазАвтоЖол» мәліметінше, 18 ақпан сағат 18:00-дегі жағдай бойынша Ұлытау облысындағы 2 республикалық автожолда көлік қозғалысы уақытша тоқтатылды. Атап айтқанда, «Қызылорда — Жезқазған — Қарағанды — Шідерті» автожолының 433–750 шақырымы Жезқазған қаласынан Жаңаарқа кентіне дейінгі аралықта және «Жезқазған — Арқалық — Петропавл» автожолының 24–64 шақырымы Сәтбаев қаласынан Жезді елді мекеніне дейін жабылды.
Сағат 21:00-ден бастап Павлодар облысында барлық бағытта қозғалысқа шектеу қойылады.
Сонымен қатар 18 ақпан сағат 21:00-де ауа райының нашарлауына байланысты бірқатар өңірде республикалық маңызы бар автожолдар барлық көлік түрлері үшін жабылады.
Ақмола облысында «Астана — Шідерті — Павлодар — Успенка — РФ шекарасы» автожолының 16–200 шақырымы Астана қаласынан Павлодар облысы шекарасына дейінгі бөлікте қозғалыс тоқтатылады.
Абай облысында «ҚХР шекарасы — Майқапшағай — Зайсан — Қалбатау — Семей — Павлодар — РФ шекарасы Үрлітөбе өткізу пункті» автожолының 583–733 шақырымы Павлодар облысы шекарасынан Семей қаласына дейін жабылады.
Қарағанды облысында да 21:00-ден бастап бірнеше бағытта қозғалыс шектеледі. «Қалқаман — Баянауыл — Үміткер — Ботақара» автожолының 231–324 шақырымы Павлодар облысы шекарасынан Ботақара ауылына дейін және «Қызылорда — Жезқазған — Қарағанды — Шідерті» автожолының 970–1135 шақырымы Қарағанды қаласынан Павлодар облысы шекарасына дейін уақытша жабылады.
Жолдарды 19 ақпан сағат 09:00-де ашу жоспарланған. Құзырлы орган жүргізушілерге алыс сапарды кейінге қалдыруды, ауа райы болжамын ескеруді және ресми ақпаратқа сүйенуді ескертті.