Алдағы бірнеше жылда ет экспорты екі есе артады – АШМ

Қазақстан алдағы бірнеше жылда шетелге ет шығару көлемін екі есе ұлғайтпақ. Бұл туралы Ауыл шаруашылығы вице-министрі Аманғали Бердалин мәлімдеді. Ауқымды жоспар елдегі ірі қара мал санын 12 миллион басқа жеткізу есебінен іске асырылмақ, деп хабарлайды Azattyq Rýhy. 

DALA.CAMP ет форумында сөйлеген вице-министр бұл саланың алдағы жеті жылдық даму жоспарымен бөлісті. Мемлекеттік стратегия бойынша мынадай көрсеткіштерге қол жеткізу көзделген:

Ірі қара мал: 8,2 млн-нан 12 млн басқа дейін;

Ұсақ мал: 28 млн басқа дейін;

Ет өндірісі: 1,2 млн тоннадан 1,8 млн тоннаға дейін;

Сүт өндірісі: 1,4 млн-нан 2,1 млн тоннаға дейін артады.

Фермерлерге қандай жеңілдіктер жасалады?

Бердалин қазіргі қолдау шараларының жеткіліксіз екенін мойындады. Сондықтан министрлік 2026-2030 жылдарға арналған жаңа кешенді жоспарды бекітті. Оның ішінде:

Төмен пайызды несие: Жылдық мөлшерлемесі 5-6% болатын жеңілдетілген несиелендіру;

Жайылымдарды игеру: Малды алыс жайылымдарда бағу үшін құдық қазу және мобильді вагондар алуға қаржы бөлу;

Ветеринариялық қауіпсіздік: Племендік жұмысты дамыту және ғылыми қолдауды күшейту жоспарлануда.

Ет бағасы өзгере ме?

Форумда Turan мал өсірушілер қауымдастығының төрағасы Жәнібек Кенжебаев нарықтағы бағаға қатысты өзекті мәселені көтерді. Оның айтуынша, саланың нақты инвестициялық тартымдылығы үшін сиыр етінің келісі 10-12 мың теңгеге дейін бағалануы тиіс.

Қазірдің өзінде ірі инвестициялық жобалар қолға алынып жатыр. Мысалы, Ұлытау облысында 5,6 млрд теңгеге 35 жаңа шаруашылық құрылды. Ал Қостанай облысының Торғай өңірінде тағы 20 шаруашылық ашу жоспарланып отыр.