Атырау облысында дәрігерге қаралуға барған ер адам қамауға алынды

Атырау облысының Жылыой аудандық соты есірткі қолданумен байланысты әкімшілік құқықбұзушылық туралы істі қарады, деп хабарлайды Azattyq Rýhy.

Соттың мәліметінше 2025 жылғы 18 желтоқсанда дәрігерлік сараптамадан өту кезінде азамат Е.-нің ағзасынан есірткі заты табылып, оны медициналық емес мақсатта тұтынғаны анықталды.

«Сот отырысында құқықбұзушы Е. кінәсін толықтай мойындап, әрекетіне өкінетінін айтты», - деп жазылған хабарламада.

Сот қаулысымен құқықбұзушы Е. кінәлі деп танылып, оған әкімшілік жаза ретінде 10 тәулікке әкімшілік қамаққа алу түрінде жаза қолданылды.

 Сот қаулысы заңды күшіне енді.