Ақмола облысында блок-бекеттер алынып тасталды

Өңір аумағына кіріп-шығатын күрежолдардың бәрінен блок-бекеттер алынып тасталды деп хабарлайды Azattyq Rýhy тілшісі.

Ақмола облыстық Полиция департаменті баспасөз қызметінің жетекшісі Гүлнәр Пинчуктің айтуынша, әуе және темір жол қатынасына шектеу қойылмағандықтан, автожолдардағы блок-бекеттер де алынып тасталған. Яғни, облысқа кіріп-шығуда ешқандай кедергі болмайды.

«Ақмола облысы аумағында күрежолдар бойына қойылған барлық блок-бекет алынып тасталды. Алдағы уақытта оларды қайта қою мәселесі әлі қаралған жоқ», - дейді Гүлнәр Пинчук.

Естеріңізге сала кетейік, Қазақстан Республикасында эпидемиологиялық жағдайды тұрақтандыру мақсатында мемлекеттік комиссияның шешімімен 5 шілдеден бастап Қазақстанда 2 апталық карантин жарияланды. Соған сәйкес, өңірлер арасындағы жолаушылар автобустарының жүруіне уақытша шектеу қойылған.

Абзал Алпысбайұлы, Ақмола облысы