Үкімет 800 теңгеге сатып алатын ПТР-тесттің нарықтағы бағасы неге 10 мың теңгеден артық?

Қазақстан Үкіметі елдегі коронавирус инфекциясын тексеретін 1,2 млн дана ПТР-тест сатып алу үшін 1 млрд теңгеге жуық қаражат бөлді. Осылайша, 1 млрд теңгеге 1,2 млн тест алынса, бір тесттің бағасы ел Үкіметінің қалтасына 830 теңге шамасында ауыртпалық салған. Бірақ, қазір жеке және мемлекеттік зертханалардағы ақылы ПТР-тесттің бағасы 11 мың теңгеден 20 мың теңгеге дейін барады.

Бүгін брифинг өткізген Людмила Бюрабековадан журналистер бұл қызықты «арифметиканың» себебін сұрады. Вице-министрдің айтуынша, зертханалар тек ПТР-тест үшін емес, оны алуға қажетті құрал жабдықтардың құнын, тіпті, зертхана қызметкерлерінің жалақысын өндіріп алу үшін бірнеше есе баға қосып отыр.

«Ақша тек қана ПТР-тест үшін емес, ПТР тестілеуді жүргізуге қажетті қызмет үшін алынады. Яғни, ол ақшаға тек тест емес, 40 түрлі зертханалық құрал-жабдықтың бағасы, зертхананың қызметі мен қызметкерлердің жалақысы да қосылады», - деп түсіндірді Бюрабекова.

Яғни, бір тест жасау үшін кешенді қызмет көрсетілетіндіктен, оның нарықтағы бағасы осындай болып отыр.

«Біздің (Денсаулық сақтау министрлігінің – авт.) ұлттық сараптама орталығымыздағы зертханаларда ПТР-тесттің бағасы 10,5 мың теңге шамасында», - деді Бюрабекова.

Кенжекей Тоқтамұрат, Нұр-Сұлтан