Хромтау тау-кен техникалық жоғары колледжі өз тарихында 7 мың жас маманды өндіріске жіберген

Хромтау тау-кен техникалық жоғары колледжі – Батыс Қазақстан аймағында тау-кен мамандарын даярлайтын жалғыз білім ордасы. Бүгінде мұнда мыңнан аса студент кен өндіру саласына қатысты түрлі мамандықтар бойынша білім алып жатыр. Заманауи инфрақұрылыммен жабдықталған оқу орны еңбек нарығына сұранысқа ие кәсіби кадрларды даярлауда алдыңғы қатардан көрініп келеді, деп хабарлайды Azattyq Rýhy Ақтөбе облысының әкімдігіне сілтеме жасай отырып. 

45 жылдық серіктестік пен дуальды білім беру

1979 жылы құрылған колледждің басты серіктесі – Дөң тау-кен байыту комбинаты. Биыл бұл серіктестіктің басталғанына 45 жыл толып отыр. Осы уақыт ішінде колледж 7 мыңнан астам маманды дайындап, өндіріске жіберген.

Колледж директоры Бағдашжан Молдашева атап өткендей, оқу орнында дуальды білім беру жүйесі толық енгізілген. Студенттер өндірістік тәжірибеден өтіп, еңбек өтілін жинақтап, болашақ жұмыс орындарымен байланыс орнатуға мүмкіндік алады. «Біздің оқушылар Дөң тау-кен байыту комбинатының цехтарында тәжірибеден өтеді», – деді ол.

Бірегей оқу-шахта және заманауи зертханалар

Колледж аумағында арнайы оқу-шахта полигоны жұмыс істейді. Бұл жерде студенттер өндірістік жағдайға барынша ұқсас ортада машықтанады. Журналистерге арналған баспасөз туры барысында қатысушылар оқу-шахтаға арнайы киіммен түсіп, құрал-жабдықтармен танысты.

Сонымен қатар, оқу орнының BOOMER-282 зертханасы, мехатроника, өндірістік автоматика, дрондармен басқару жүйелері (БПЛА) сияқты заманауи зертханалары көрсетілді.

Президент келіп, IT бағыты дамып жатыр

Өткен жылы колледжге Мемлекет басшысы Қасым-Жомарт Тоқаев арнайы келіп, студенттермен және оқытушылармен кездесті. Бұл – оқу орны үшін үлкен мәртебе болды. Қазір мұнда цифрлық технологиялар, жасанды интеллект және IT саласы қарқынды дамып келеді. Жыл сайын түлектердің 95 пайызы жұмыспен қамтылады.

Жетістіктері мен халықаралық мойындау

Хромтау колледжі – «Жылдың үздік колледжі» ұлттық байқауының жеңімпазы әрі еліміздегі үздік 10 колледждің қатарында. Сонымен бірге халықаралық NCCER аккредитациясынан өткен, WorldSkills қозғалысының белсенді қатысушысы. Колледж жанынан жыл сайын 800-ден астам маман оқытылатын салалық құзыреттер орталығы да жұмыс істейді.

Жаңа жобалар және өндірістегі түлектер

ERG және Дөң тау-кен байыту комбинатының қолдауымен колледжде ірі жобалар жүзеге асуда. Олардың қатарында ERG SKILLS чемпионаты, «Жас маман» бағдарламасы, TIKA жобасы, «ДТБК-ға арналған жаңа мамандықтар атласы» және «ERG колледждер үшін» бастамасы бар.

Баспасөз турына қатысқан журналистер студенттердің өндірістік өмірге дайындығын көріп, колледж түлектерінің бүгінде жаңа ашылған «Болашақ» шахтасында еңбек етіп жүргеніне куә болды.